ރާއްޖެއަކީ 100 ޕަސެންޓް މުސްލިމް ގައުމަކަށް ވީހިނދު، ދިވެހިންގެ ހިތްތަކުގައި ދީނީ އަގީދާ އަށަގެންނެވުމަށް މަސައްކަތްކުރަން ޖެހޭ ކަމަށް، ނައިބު ރައީސް ފައިސަލް ނަސީމް ވިދާޅުވެއްޖެއެވެ.
މިއަދު އިސްލާމީ މަރުކަޒުގެ ޖަލްސާކުރާ މާލަމުގައި، ރާއްޖެ އިސްލާމްވި ދުވަހާ ގުޅިގެން ބޭއްވި ޖަލްސާ ޝަރަފުވެރިކޮށްދެއްވައި ދެއްކެވި ވާހަކަފުޅުގައި، ނައިބު ރައީސް ވިދާޅުވީ މިފަދަ ދުވަހެއް ފާހަގަ ކުރާއިރު، އިސްލާމްދީނުގެ ސަބަބުން ލިބިދޭ ފިލާވަޅުތަކަށް ވިސްނަންޖެހޭ ކަމަށާއި، ދެދުނިޔޭގެ ނަސީބު ހޯދުމަށް ގަދައަޅާ މަސައްކަތްވެސް ކުރަން ޖެހޭ ކަމަށެވެ.
އިސްލާމްދީން ދައްކުވައިދެނީ ސީދާވެގެންވާ ތެދުމަގު ކަމަށާއި، ދީނުގައި އެންމެ އަހަންމިއްޔަތުކަންދޭ އެއް ސިފައަކީ ރިވެތި އަޚްލާގު ކުރިއެރުވުން ކަމަށް ވިދާޅުވެ، އެކަކު އަނެކަކަށް އިހްތިރާމު ކުރުމަށާއި، އެހީތެރިވެ އޯގާތެރިވުމަށާއި، ހެޔޮ އަމަލުތައް ކޮށް، އެއްބައިވަންތަކަން އާލާކުރުމަށް ނައިބު ރައީސް ބާރުއެޅުއްވިއެވެ.
"މުޅި އިސްލާމްދީނުން އަޅުގަނޑުމެންނަށް ދައްކުވައިދެނީ ސީދާވެގެންވާ ތެދުމަގު. އަޅުގަނޑުމެންގެ ދިރިއުޅުމުގައި ދިމާވާ އެކި ކަންތައްތަކުގެ ހައްލު. އަޅުގަނޑުމެން އެބަޖެހޭ ކަންތައްތައް ހޯދާ ބަލާ ބަޔަކަށް ވާން." ނައިބު ރައީސް ވިދާޅުވިއެވެ.
މީގެ އިތުރުން، ނައިބު ރައީސް ވަނީ ބޭރުގެ އެކި ސަގާފަތްތަކުން ދަސްވާ ނޭދެވޭ ކަންތައްތައް ދޫކޮށް ރަނގަޅު އަމަލުތަކުގައި ހިފުމަށާއި، މައިންބަފައިން ދަރިން ތަރުބިއްޔަތު ކުރުމުގައި މިފަދަ ކަންތައްތަކަށް ސަމާލުވުމަށް ގޮވާލައްވައި، ހަޔާތުގައި ދިމާވާ ކަންތައްތަކުން ފިލާވަޅު ލިބިގަތުމަަށް އެދިވަޑައިގެންފައެވެ.
