ރ. މަޑުއްވަރީގައި ހަރުކަށި ފިކުރާ ދެކޮޅަށް ފުލުހުން ހިންގި އޮޕަރޭޝަނުގައި ހައްޔަރު ކުރި މީހެއްގެ ފޯނުން އައިއެސް ޖަމާއަތުގެ ދިދަ ފެނުނުމުން އޭނާގެ މައްޗަށް ކުރި، ޓެރަރިސްޓް ޖަމާއަތަކަށް ތާއީދު ކުރާކަން ދޭހަވާ ފަދަ ލިޔުމެއް ގެންގުޅުމުގެ ކުށުގެ ދައުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމައިފިއެވެ.
އެ ދައުވާ ކޮށްފައިވަނީ ޖެނުއަރީ 7، 2020 ގައި ފުލުހުން މަޑުއްވަރީގައި ހިންގި އޮޕަރޭޝަނެއްގައި ހައްޔަރުކުރި އެ ރަށު ސައީދާ މަންޒިލް މުހައްމަދު މައުޖޫދުގެ މައްޗަށެވެ.
މި މައްސަލަ ދައުލަތުން ކޯޓަށް ހުށަހެޅި އިރު މައުޖޫދުގެ އަތުން ފޯނެއް ފެނުނުކަން އެނގޭ ލިޔުމެއް ދައުލަތުން ހުށަހަޅާފައި ނުވާ ކަމަށާއި ފޮޓޯ ފެނުނު މޯބައިލް ފޯނުގެ ފޮރެންސިކް ރިޕޯޓު ހުށަހެޅި އިރު، ފޯނެއް ނެގި ކަމުގެ ލިޔުން ހުށަހަޅާފައި ނުވާތީ މައުޖޫދުގެ ފަރާތުން ބުނެފައި ވަނީ އެ ފޮރެންސިކް ރިޕޯޓު ބަލައި ނުގަނެވޭނެ ކަމަށެވެ.
ފޮޓޯ ފެނުނު ފޯނު ފުލުހުންގެ ބެލުމުގެ ދަށަށް ގެންދިޔައީ މައުޖޫދު ހައްޔަރު ކުރިތާ 23 ދުވަސް ފަހުން ކަމަށް ވާއިރު އޭގެ ޗެއިން އޮފް ކަސްޓަޑީގައި ވަނީ ފޯނު ނެގީ ފުލުހުންގެ ކަސްޓޯޑިއަލް އިން ކަމަށެވެ. އެހެންކަމުން ފޯނު އެއް ތަނުން އަނެއް ތަނަށް ގެންދިޔަ ގޮތުގެ ޗެއިން އޮފް ކަސްޓަޑީ ފުރިހަމަ ނުވާ ކަމަށް ވެސް މައުޖޫދުގެ ފަރާތުން ބުންޏެވެ.
މި ސުވާލުތަކަށް ދައުލަތުން އެކަށީގެންވާ ޖަވާބެއް ނުދެވޭ ކަމަށް ކްރިމިނަލް ކޯޓުގެ ގާޒީ ހުސެއިން ފާއިޒު ރަޝާދު ނިންމެވި ނިންމުމުގައި ވެއެވެ. އަދި މައުޖޫދުގެ ފޯނު ކަމަށް ބުނާ ފޯނު ނެގި ތަނާއި ފޯނު ނެގި ތާރީހާއި އެކަކު އަތުން އަނެކަކު އަތަށް ފޯނު ދިޔަ ގޮތް ބަޔާން ބަޔާންކޮށްފައި ނުވާތީ އެ މައްސަލައިގައި މޯބައިލް ފޯނުގެ ފޮރެންސިކް ރިޕޯޓު ބަލައިނުގަނެވޭނެ ކަމަށް ނިންމެވިއެވެ.
