އަމާން ކަމާއި ރައްކާތެރިކަން ނެތް ކަމަށް ބުނެ، ރައްޔިތުންގެ ފައިސާއިން އެތައް ހާހެއް ދުވާލަކު ހަރަދުކޮށްގެން، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހޮޓެލް ޖެންގައި ބެހެއްޓުމަކީ ގަބޫލުކުރެވޭ ކަމެއް ނޫން ކަމަށް، އިދިކޮޅު ޕީޕީއެމްގެ ނައިބު ރައީސް އަދި ހުޅުމާލެ ދާއިރާގެ ކައުންސިލަރު އިބްރާހީމް ޝުޖާއު ވިދާޅުވެއްޖެއެވެ.
ރޭ އިދިކޮޅު ޕްރޮގްރެސިވް ކޮންގްރެސް ކޯލިޝަނުން ބޭއްވި ޖަލްސާގައި ވާހަކަ ދައްކަވަމުން ޝުޖާއު ވިދާޅުވީ، ރައީސް އިބްރާހީމް މުހައްމަދު ސޯލިހުގެ ސަރުކާރުން ދަނީ ރައްޔިތުންގެ ފައިސާ "ހިތުހުރި ގޮތަކަށް" ބޭނުން ކުރަމުން ކަމަށާއި، އެގޮތުން ހޮޓެލް ޖެންގައި ނަޝީދަށް ދުވާލަކަށް 6،000 އެމެރިކާ ޑޮލަރު (92،520 ރ.) ހަރަދުކުރާ ކަމަށެވެ.
ޝުޖާއު ވިދާޅުވި ގޮތުގައި ރައީސްގެ ޒިންމާއަކީ ނަޝީދާއި ކުރީގެ ރައީސް އަބްދުﷲ ޔާމީންގެ ސަލާމަތާއި ރައްކާތެރިކަން ކަށަވަރު ކުރުން ކަމަށާއި، ނަމަވެސް އޭގެ މާނައަކީ ރައްޔިތުންގެ ފައިސާއިން ހަރަދު ކޮށްގެން ނަޝީދު ހޮޓަލެއްގައި ބެހެއްޓުން ނޫން ކަމަށާއި، މިކަމަކީ ގަބޫލުކުރެވޭ ކަމެއް ނޫން ކަމަށެވެ.
އަދި ރައްޔިތުން އަސާސީ ހިދުމަތްތައް ނުލިބި، މަހުން މަހަށް ދައްކަން ޖެހޭ ބިލުތައް ނުދެއްކިގެން އުޅޭއިރު، ރައްޔިތުންގެ ފައިސާއިން މިގޮތަށް ހަރަދު ކުރުމަކީ ރައްޔިތުން ވިސްނާލަން ޖެހޭ ކަމެއް ކަމަށް ޝުޖާއު ވިދާޅުވިއެވެ.
މީގެ އިތުރުން، ހިޔާ ފްލެޓުގައި އާންމުން ދިރިއުޅެނީ ދަތި ހާލުގައި ކަމަށް ވިދާޅުވާ ވިދާޅުވުމާއި، އުތުރު ތިލަފަޅު އެއްބަސްވުން ހާމަކުރުމަށް ގޮވާލާ ގޮވާލުން، ޝުޖާއު ވަނީ ތަކުރާރު ކުރައްވާފައެވެ.
ނަޝީދު ގޭގަބަހައްޓައިގެން ހިމާޔަތްދެވޭނެ ! ދައުލަތުގަ ހުންނާނީ ރައްޔިތުންގެ ފައިސާ އެކަމަކު ވަކިފަރުދަކަށް އެހާގިނަފައިސާ ހޭދަކުރުމަކީ ބޮޑުހިޔާނާތެއް
ތިރަ ހެރީ ރީނދޫ ޕާޓީގެ ހަމަހަމަ ކަން ހުންނަ ގޮތް. އޭނާ އެތަނުން މިހާރު ބޭރު ކުރޭ! އޭނާ ހުންނަ ފްލޯ ޖެހުނު މަތީ ފްލޯ އާއި ތިރިން ޖެހުނު ފްލޯ ހުސްކޮށް ބާއްވައިގެން އަށެއްކަ ހާސް ޑޮލަރު އަހަރުމެންގެ ފައިސާއިން އިސްރާފު ކުރުމީ ހުރިހާ ހުވައަކާ ޚިލާފު ކަމެއް!