އޮޑިޓް އޮފީހަށް އަންނަ އަހަރު 90.3 މިލިއަން ރުފިޔާގެ ބަޖެޓެއް ދޭން ރައްޔިތުންގެ މަޖިލީހުން މިއަދު ފާސް ކޮށްފިއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީން އެ ބަޖެޓު ކުރިން ފާސް ކޮށްފައިވާ އިރު ކޮމިޓީން ނިންމީ އޮޑިޓް އޮފީސް ހިންގުމުގެ ހަރަދާއި އަދި ހަރުމުދާ ގަތުމަށް 60.3 މިލިއަން ރުފިޔާ އަދި އާ އޮޑިޓް އޮފީސް އެޅުމަށް ހިންގާ ޕީއެސްއައިޕީ ޕްރޮޖެކްޓަށް 30 މިލިއަން ރުފިޔާއާއެކު ޖުމްލަ 90.3 މިލިއަން ރުފިޔާގެ ބަޖެޓެއް ދޭށެވެ.
މާލިއްޔަތު ކޮމިޓީގެ ނިންމުން މިއަދު މަޖިލީހުގެ ތަޅުމުން ފާސްކުރީ 49 މެމްބަރުންގެ ވޯޓާއެކުއެވެ. ނުފެންނަަ ކަމަށް އެއްވެސް މެމްބަރަކު ވޯޓެއް ނުދެއްވައެވެ. އޮޑިޓް އޮފީހުން އެންމެ ފުރަތަަމަ އެދުނީ 118.7 މިލިއަން ރުފިޔާގެ ބަޖެޓަކަށެވެ. ނަމަވެސް ފިނޭންސާއި މަޖިލީހާއެކު ކުރި މަޝްވަރާތަކަށް ފަހު އެ އަދަދު ކުޑަކޮށް މިއަދު ފާސްކުރި އަދަދަށް އޮޑިޓް އޮފީހުން ބަޖެޓް ހުށަހެޅިއެވެ.
އަންނަ އަަހަރަށް 90 މިލިއަން ރުފިޔާގެ ބެޖެޓެއް އޮޑިޓް އޮފީހަށް ދޭން ނިންމި އިރު މި އަހަރު އޮޑިޓް އޮފީހަށް ލިބުނީ 81 މިލިއަން ރުފިޔާގެ ބަޖެޓެކެވެ.
