ފުލުހުންގެ ތިން އޮފިސަރަކު ވަޒީފާއިން ވަކިނުކުރުމަށް ހައި ކޯޓުން އަމުރު ކޮށްފިއެވެ.
ވަޒީފާއިން ވަކި ނުކުރަން އަމުރު ނެރެދީފައިވާ ތިން އޮފިސަރުންނަކީ ސުޕްރިންޓެންޑެންޓް އިސްމާއިލް ޝަމީމް އާދަމް، ޗީފް ސުޕްރިންޓެންޑެންޓް އަބްދުﷲ ޝަރީފު އަދި ސުޕްރިންޓެންޑެންޓް މުހައްމަދު ދާއޫދެވެ.
އެ ތިން އޮފިސަރުން މަގާމުން ވަކި ކުރުމަށް ފޮނުވާފައިވާ 10 ދުވަހުގެ ނޯޓިސް މިރޭގެ 12:00 އިން ހަމަވާނެއެވެ.
ހައިކޯޓުން އެގޮތަށް އަމުރު ނެރެފައި މިވަނީ ފުލުހުންގެ އާ ގާނޫނުގެ ދަށުން އެކުލަވާލި ޕޮލިސް ބޯޑުގެ ލަފާގެ މަތިން ފުލުހުންގެ ވަޒީފާއިން ވަކިކުރަން ނިންމާފައިވާ ފުލުހުންގެ ހަތް އޮފިސަރުންގެ މައްސަލައިގައެވެ.
ފުލުހުންގެ ގާނޫނުގެ ދަށުން އުފައްދާފައިވާ ޕޮލިސް ބޯޑުން ވަކިކުރަން ނިންމާފައި ވަނީ 7 އޮފިސަރުންނެވެ. އެއީ އެސިސްޓެންޓް ކޮމިޝަނާ އަހްމަދު މުހައްމަދާއި، އެސިސްޓެންޓް ކޮމިޝަނާ މުހައްމަދު ޖަމްޝީދާއި، އެސިސްޓެންޓް ކޮމިޝަނާ ފަރުހާދު ފިކުރީ އާއި، ޗީފް ސުޕްރިންޓެންޑެންޓް އަހުމަދު ޝުހާދު އާއި، ޗީފް ސުޕްރިންޓެންޑެންޓް އަބްދުﷲ ޝަރީފް އާއި، ސުޕްރިންޓެންޑެންޓް އިސްމާއިލް ޝަމީމްގެ އިތުރުން ސުޕްރިންޓެންޑެންޓް މުހައްމަދު ދާއޫދު އެވެ.
މި އޮފިސަރުންނަށް ފިޔަވަޅު އަޅަން ޕޮލިސް ބޯޑުން ނިންމާފައި ވަނިކޮށް ސިވިލް ކޯޓަށް 5 އޮފިސަރެއްގެ ފަރާތުން މައްސަލަ ހުށަހަޅާފައި ވަނީ ކުރީގެ ޑެޕިއުޓީ ޕްރޮސެކިއުޓަރު ޖެނެރަލް މަރިޔަމް ނިހާޔަތުގެ ދިވެހި ޗޭމްބާޒް ލޯ ފާމުންނެވެ. ސިވިލް ކޯޓަށް ހުށަހަޅާފައިވާ މައްސަލައިގައި ފަރުހާދާއި ޝުހާދު ބައިވެރިވެފައެއް ނުވެއެވެ.
މި މައްސަލަ ސިވިލް ކޯޓުގައި ކުރިއަށް ދަނިކޮށް ހޯމް މިނިސްޓްރީން ވަނީ ވަޒީފާ އިން ވަކި ކުރަން ނޯޓިސް ދިން އޮފިސަރުންގެ ތެރެއިން ޖަމްޝީދާއި އަހްމަދު މުހައްމަދު މިހާރު ވަޒީފާއިން ވަކިކޮށްފައެވެ.
އެ މައްސަލަ ސިވިލް ކޯޓުން ނިމެންދެން އެ މީހުން ވަޒީފާއިން ވަކިކުރުން ފަސްކުރުމުގެ ވަގުތީ އަމުރަކަށް އެދިފައި ވަނީ މިދިޔަ ހަފްތާގަ އެވެ. ނަމަވެސް އެފަދަ އަމުރެއް ނެރެދެވެން ނެތް ކަމަށް ކޯޓުން ނިންމުމުން މައްސަލަ ވަނީ ހައިކޯޓުގައި އިސްތިއުނާފް ކޮށްފައެވެ.
ސިވިލް ކޯޓުގެ އެ ނިންމުން ހައިކޯޓުގައި އިސްތިއުފާން ކުރުމުން އެ ކޯޓުން މިއަދު ވަނީ އެ މައްސަލައިގައި ވަކި ގޮތެއް ނިންމަންދެން މިރޭގެ ނިޔަލަށް ވަޒީފާ އިން ވަކިކުރުމުގެ ނޯޓިސް ހަމަވާ ތިން އޮފިސަރުން ވެސް މަގާމުން ވަކިކުރުން މަޑުޖައްސާލަން އަންގާފައެވެ.
ފުލުހުންގެ ވަޒީފާއިން ވަކިކުރަން ނިންމާފައިވާ ކޮމިޝަންޑް އޮފިސަރުން އެކަމާ ދެކޮޅަށް ސިވިލް ކޯޓަށް ހުށަހެޅި މައްސަލައިގެ ޑިސްޕިއުޓް މަރުހަލާ ނިމި މިހާރު ޝަރީއަތަށް މައްސަލަ ގޮސްފައި ވާއިރު، އޮފިސަރުން ވަނީ އެ ޝަރީއަތް ލައިވްކޮށްދޭން އެދިފައެވެ. ނަމަވެސް ސިވިލް ކޯޓުން ނިންމީ އެ މައްސަލައިގެ އަޑުއެހުންތައް ސިއްރުކުރާ ގޮތަށެވެ.
