ހަރުކަށި ފިކުރަށް ދަރިވަރުން ދިއުން ހުއްޓުވަން އިސްލާމް ކިޔަވައިދޭން ރާއްޖެއިން ބޭރުން ޓީޗަރުން ގެނައުމަށް އެޑިއުކޭޝަން މިނިސްޓްރީން ވިސްނަމުން ދާ ކަމަށް ބުނެ އެމްޑީޕީގެ "މެއި ހައެއް ކޮމެޓީ" އިން ދެއްކި ވާހަކަ އެ މިނިސްޓްރީން ދޮގުކޮށްފިއެވެ.
މިނިސްޓްރީން ނެރުނު ބަޔާނެއްގައި ބުނީ ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީއިން އެކުލަވާލި ރިޕޯޓްގައި ހުށަހަޅާފައިވާ ރިކޮމަންޑޭޝަންތަކުގެ ތެރެއިން، އެމިނިސްޓްރީއާ ގުޅޭ ކަމަށް އެރިޕޯޓްގައި ފާހަގަ ކޮށްފައިވާ ކަންކަން ތަންފީޒު ކުރުމުގެ މަސައްކަތާ ބެހޭ ގޮތުން މަޝްވަރާ ކުރުމަށް އެމްޑީޕީގެ މޭ 6ގެ ކޮމިޓީއިން މި މިނިސްޓްރީއާ ބައްދަލު ކޮށްފައިވާ ކަމަށެވެ. އަދި އެ ބައްދަލުވުމުގައި ދެކެވުނު ވާހަކަ ތަކުގެ ތެރޭގައި އިނގިރޭސި ބަހުން އިސްލާމް މާއްދާ ކިޔަވައިދިނުމާ ގުޅޭ ގޮތުން މަޝްވަރާ ކޮށްފައިވާ ކަމަށް މިނިސްޓްރީން ބުނެއެވެ.
ނަމަވެސް އިސްލާމް މާއްދާގެ މުގައްރަރު ތައްޔާރު ކުރެވިފައި ވަނީ ދިވެހި ބަހުން ކަމަށް ވެފައި އަދި، އެ މާއްދާ ކިޔަވާ ދިނުމަށް ތަމްރީން ކޮށްފައިވާ، ފެންވަރު ރަނގަޅު ދިވެހި ޓީޗަރުން ދިވެހިރާއްޖޭގައި ތިބުމުން، އިނގިރޭސި ބަހުން އެ މާއްދާ ކިޔަވާ ދިނުމަށް މިނިސްޓްރީ އިން ވިސްނާފައި ނުވާ ކަމަށް ބުނެއެވެ.
އަދި، އިސްލާމް ކިޔަވައިދިނުމަށް ބޭރު ގައުމުތަކުން ޓީޗަރުން ގެނައުމުގެ ވިސްނުމެއް ވެސް ނެތް ކަމަށް މިނިސްޓްރީން ވަނީ ބުނެފައެވެ.
އެމްޑީޕީގެ މެއި 6 ކޮމިޓީން ކުރަމުންދާ މަސައްކަތުގެ މައުލޫމާތު ދިނުމަށް ރޭ ބޭއްވި ގައުމީ މަޖިލީހުގެ ޖަލްސާގައި ވާހަކަ ދައްކަވަމުން އެ ކޮމެޓީގެ މުގައްރިރު ހަސަން އަފީފް ވަނީ ކޮމެޓީގެ މެންބަރުން މިދިޔަ ބުރާސްފަތި ދުވަހު އެޑިއުކޭޝަން މިނިސްޓަރު ޑރ. އައިޝަތު އަލީ އާއެކު ބޭއްވި ބައްދަލުވުމުގައި ދަރިވަރުންގެ ތެރޭގައި ހަރުކަށި ފިކުރު ފެތުރިފައި އޮތް މިންވަރާމެދު ވާހަކަ ދައްކާފައިވާ ކަމަށް ވިދާޅުވެފައެވެ.
އެގޮތުން ރަށްރަށުގައި ހަރުކަށި ފިކުރަށް ހެއްލޭ ބައެއް ކުދިން ފާހަގަކުރެވިފައިވާ ކަމަށާ އެކަންކަން ހުއްޓުވަން އެޑިއުކޭޝަން މިނިސްޓްރީން ކުރަމުން ގެންދާ މަސައްކަތްތަކުގެ ތެރެއިން ވަކި އަދަދަކަށް އިސްލާމް ކިޔަވައިދޭން ބޭރުން ޓީޗަރުން ގެނައުމުގެ ވިސްނުމެއް މިނިސްޓްރީން ގެންގުޅޭ ކަމަށް އަފީފް ވިދާޅުވިއެެވެ.
