އާމްދަނީން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލު، ވަކި ވިޔަފާރި މަޝްރޫއުތަކުން ލިބޭ އާމްދަނީން ޓެކްސް ނުނެގޭ ގޮތަށް ރައީސުލްޖުމްހޫރިއްޔާއަށް ބާރު ލިބިދޭ ގޮތަށް އާމްދަނީން ނަގާ ޓެކްސްގެ ގާނޫނަށް އިސްލާހު ގެނައުމުގެ ބިލު ރައްޔިތުން މަޖިލީހުން ފާސްކޮށްފިއެވެ.
މި ބިލު ފާސްކޮށްފައިވަނީ އިގްތިސޯދީ ކޮމިޓީ އިން އެ ބިލު ދިރާސާކޮށް އެކުލަވާލާފައިވާ ރިޕޯޓަށް މާ ބޮޑު ބަދަލެއް ނުގެނެސް މުޅި މަޖިލިސް އެއްކޮށްގެން ބޭއްވި ކޮމިޓީ އިން 27 މެންބަރުންގެ ވޯޓުންނެވެ. މި ބިލު އެގޮތަށް ފާސް ކުރަން ނުފެންނަކަމަށް ވޯޓު ދީފައިވަނީ އެންމެ މެންބަރެކެވެ.
މި ބިލު މަޖިލީހަށް ހުށަހަޅައިފައިވަނީ ސަރުކާރުގެ ފަރާތުން ގައްދޫ ދާއިރާގެ މެންބަރު އަހްމަދު ޒާހިރުއެވެ. މި ބިލުގައި ޓެކްސް ނެގުން ހާއްސަ އިސްތިސްނާއެއް ދެވޭ ބާބުގައި ޓެކްސް ނެގުން އިސްތިސްނާވާ އިތުރު އާމްދަނީތަކެއް ހިމަނާފައިވެއެވެ.
އޭގެތެރޭގައި ރައީސް އާއި ނައިބު ރައީސަށް ދައުލަތުން ހަމަޖައްސައިދޭ ގެކޮޅާއި ކާރުކޮޅާއި ގެކޮޅުގައި މަސައްކަތް ކުރާ މުވައްޒަފުންގެ މުސާރަ އަދި ކާރުކޮޅުގެ ޑްރައިވަރުގެ މުސާރަ ހިމަނާފައިވެއެވެ.
ކޮމިޓީ މަރުހަލާގައި ބިލު ދިރާސާކުރުމަށް ފަހު އުއްތަމަ ފަނޑިޔާރާއި ރައްޔިތުންގެ މަޖިލީހުގެ ރައީސަށް ދައުލަތުން ހަމަޖައްސައިދޭ ކާރުކޮޅާއި ގެކޮޅާއި ގެކޮޅުގައި މަސައްކަތް ކުރާ މުވައްޒަފުންގެ މުސާރައާއި ޑްރައިވަރު މުސާރަ ވެސް ވަނީ މި ބިލުގައި ހިމަނާފައެވެ. އެހެންކަމުން މި މުސާރަތަކުންނާއި އިނާޔަތްތަކުން ދެން ޓެކްސް އެއް ނުނަގާނެއެވެ.
އަދިހަމައެހެންމެ ވަކި ވިޔަފާރިތަކުން ޓެކްސް ނެގުމުގެ އިހުތިޔާރު ރައީސަށް ލިބިގެންވާ ކަމަށް އެ ބިލުގައި އިތުރު ކޮށްފައިވާ މާއްދާއެއްގައި ވެއެވެ. މިގޮތަށް ޓެކްސް ނެގުމުން އިސްތިސްނާވާނެ މަޝްރޫއުތައް ކަނަޑައަޅަން ޖެހޭނީ ވަޒީރުންގެ ލަފާ ހޯއްދަވައިގެންނެވެ.
އިސްތިސްނާ ހޯދުމަށް އެދި ހުށަހެޅުމާއި ފުރިހަމަ ވާން ޖެހޭ ޝަރުތުތައް ހިމެނޭ އުސޫލެއް ފިނޭންސް މިނިސްޓްރީން ތައްޔާރުކުރަން ޖެހެއެވެ. އެފަދަ އިސްތިސްނާއެއް ދެވޭ ފަރާތްތައް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން އޮޑިޓު ކުރަންވާނެ ކަމަށް ބިލުގައި ބަޔާންކޮށްފައި ވެއެވެ.
ފިނޭންސް މިނިސްޓްރީން އެކުލަވާލާ ގަވާއިދާއި މީރާއިން އެކުލަވާލާ އޮޑިޓް ސަރުކާރުގެ ގެޒެޓްގައި ޝާއިއު ކުރަން ވެސް އެ ބިލުގައި ބަޔާން ކޮށްފައިވެއެވެ.
