ދެތިން ދުވަހުގެ ބެކްލޮގާއެކު މިއަދު 2،194 މީހަކު ކޮވިޑަށް ޕޮޒިޓިވް ވެފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
މިއަދު ބަލި ޖެހުނު 2،194 މީހުންގެ ތެރެއިން 1،698 މީހުންނަކީ މާލޭ ސަރަހައްދުން ބަލި ޖެހުނު މީހުންނެވެ. މިއަދު އަތޮޅުތެރެއިން ޕޮޒިޓިވް ވެފައި ވަނީ 467 މީހުންނެވެ. އަދި ރިސޯޓްތަކުން 29 މީހަކު މިއަދު ޕޮޒިޓިވް ވެފައި ވެއެވެ.
މިދިޔަ 24 ގަޑިއިރުތެރޭ 7،259 ސާމްޕަލް ނަގައިފައި ވާކަމަށް އެޗްޕީއޭއިން ބުނެއެވެ. މިއަދު ޕޮޒިޓިވް ވި މީހުންނާއެކު ރާއްޖެއިން ބަލިޖެހުނު ޖުމްލަ އަދަދު ވަނީ 50،802 އަށް އަރާފައެވެ. އަދި އެކްޓިވްކޭސްތަކުގެ އަދަދު 20،276 އަށް އަރާފައި ވާއިރު ހޮސްޕިޓަލުގައި އެޑްމިޓް ކޮށްގެން 280 މީހުންނަށް ފަރުވާދެމުން ގެންދެއެވެ. އެޗްއީއޯސީން ރޭގައި ބޭއްވި ޕްރެސް ކޮންފަރެންސްގައި ބުނެފައިވަނީ އެނދުތައް ފުރި ފަރުވާ ދޭންވީ ބަލިމީހާވެސް ކަނޑައަޅާ ހިސާބަށް ގޮސްފި ކަމުގައެވެ.
ކޮވިޑް ކޭސްތައް އިތުރުވެ ރާއްޖޭގައި ވަނީ ފިޔަވަޅުތައް ހަރުކަށި ކޮށްފައެވެ. އެގޮތުން މާލެ ސަރަހައްދުގައި (މާލެ، ހުޅުމާލެ، ވިލިމާލެ) ހަވީރު ހަތަރަކުން ފަތިހު ހަތަރަކާ ދެމެދު ބޭރަށް ނިކުމެ އުޅުން މަނާކުރުމާއި މިސްކިތްތަކުގައި ޖަމާއަތުގައި ނަމާދު ކުރުން ހުއްޓާލުމަށް ވަނީ އަންގާފައެވެ.
މާލެ ސަރަހައްދުގެ އިތުރުން އަތޮޅުތެރޭގައިވެސް ކޮވިޑް ކޭސްތައް އިތުރުވާން ވަނީ ފަށާފައެވެ. މިވަގުތުވެސް 66 ރަށެއް ވަނީ މޮނިޓަރިންގެ ހާލަތައް ގެނެސްފައެވެ.
