ހަލުވި ކަމާއެކު ރާއްޖޭގައި ފެތުރެމުންދާ ކޮވިޑްގައި މަރުވި މީހުންގެ އަދަދު 100 އަށް އަރައިފިއެވެ.
އެޗްޕީއޭއިން ބުނީ، އިއްޔެގެ އިރު އޮއްސުނު ފަހުން މިއަދުގެ މިހާތަނަށް 3 މީހަކު މަރުވެފައި ވާ ކަމަށެވެ.
ކޮވިޑްގައި މަރުވި 98 ވަނަ މީހާ މަރުވެފައި ވަނީ ރޭ 10:44 ގައެވެ. އެއީ ހުޅުމާލެ މެޑިކަލް ފެސިލިޓީގައި ފަރުވާ ދެމުން ދިޔަ އުމުރުން 80 އަހަރުގެ ދިވެހި އަންހެނެކެވެ.
99 ވަނަ މީހާ މަރުވީ، ރޭ 12:14 ގައި ދަރުމަވަންތަ ހޮސްޕިޓަލުގެ ޑީއެޗް 11 ގައެވެ. އެއީ 64 އަހަރުގެ ދިވެހި ފިރިހެނެކެވެ.
ކޮވިޑްގައި މަރުވި 100 ވަނަ މީހާ މަރުވެފައި ވަނީ ރޭ ފަތިހު 4:41 ގައި ދަރުމަވަންތަ ހޮސްޕިޓަލުގެ ޑީއެޗް 11 ގައެވެ. އެއީ އުމުރުން 56 އަހަރުގެ ދިވެހި އަންހެނެކެވެ.
ރާއްޖޭގައި މި ފާއިތުވާ ހަފްތާއަކީ، އާދަޔާ ހިލާފަށް ކޮވިޑް ޖެހޭ މީހުންގެ އަދަދު މަތީ ހަފްތާއެކެވެ. ކޮންމެ ދުވަހެއްގެ އަދަދުތައް 1000 އިން މަތިން ދާ އިރު، ގިނައީ މާލެ ސަރަހައްދުން ޕޮޒިޓިވް ވާ މީހުންނެވެ. މާލެ ސަރަހައްދުގައި ކޮވިޑަށް ޓެސްޓް ކުރާ ކޮންމެ 3 މީހަކުން 1 އެއް ކޮވިޑަށް ޕޮޒިޓިވް ވެއެވެ.
