ކޮވިޑް ޖެހިގެން ރާއްޖޭގައި ރެއާއި މިއަދު މީހަކު މަރުވެއްޖެއެވެ. ހެލްތު ޕްރޮޓެކްޝަން އެޖެންސީން ބުނީ ރޭ މަރުވެފައި ވަނީ 63 އަހަރުގެ މީހެއް ކަމަށާއި މިއަދު މަރުވެފައި ވަނީ އުމުރުން 87 އަހަރުގެ މީހެއް ކަމަށެވެ.
ރޭ 12 ޖަހަން އުޅެނިކޮށް މަރުވި 63 އަހަރުގެ މީހާއަކީ އަންހެނެކެވެ. އޭނާ މަރުވީ ދަރުމަވަންތަ ހޮސްޕިޓަލުގެ ޑީއެޗް11 ގައި އެޑްމިޓް ކޮށްގެން ފަރުވާ ދެމުން ދަނިކޮށެވެ. އޭނާ މަރުވީ ރޭ 11:53 ކަން އިއުލާން ކުރީ ރޭ 1 ޖަހަނިކޮށެވެ. އެއީ ކޮވިޑްގައި މަރުވި 92 ވަނަ މީހާ ކަމަަށް އެޗްޕީއޭއިން ބުނެއެވެ.
މިއަދު މަރުވި 87 އަަހަރުގެ މީހައަކީ ފިރިހެނެކެވެ. އޭނާ މަރުވީ ކޮވިޑަށް ފަރުވާ ދެމުން ދަނިކޮށް ހުޅުމާލޭ މެޑިކަލް ފެސިލިޓީގައި ދަންވަރު 1:39 ގައެވެ. މިއީ ކޮވިޑްގައި ރާއްޖެއިން މަރުވި 93 ވަނަ މީހާއެވެ.
ރާއްޖޭގައި ކޮވިޑް ޖެހޭ ނިސްބަތް އިންތިހާއަށް މައްޗަށް ގޮސްފައި ވާއިރު، މިމަހު މަރުވި މީހުންގެ އަދަދު މިވަނީ 21 އަށް އަރާފައެވެ.
އިއްޔެ ރާއްޖެއިން 1467 މީހަކަށް ވަނީ ކޮވިޑް ޖެހިފައެވެ. އޭގެ ތެރެއިން 939 ކޭސްއަކީ އިއްޔެގެ އިރު އޮއްސި 6 އާ ހަމައަށް ޕޮޒިޓިވް ވެފައިވާ ކޭސްތަކެވެ. ބަލި ޖެހުނު 1467 މީހުންގެ ތެރެއިން 1267 މީހުންނަކީ މާލޭ ސަރަހައްދުން ބަލި ޖެހުނު މީހުންނެވެ. އިއްޔެ އަތޮޅުތެރެއިން 182 މީހުން ޕޮޒިޓިވް ވި އިރު ރިސޯޓްތަކުން 18 މީހަކު ވަނީ ޕޮޒިޓިވް ވެފައެވެ.
