ކޮވިޑް ވެކްސިންގެ ފުރަތަމަ ޑޯޒު ޖެހުން އިއްޔެ ހުއްޓާލާފައިވާއިރު ވެކްސިން ދޭންޖެހޭ ހާއްސަ ކެޓަގަރީގެ މީހުންނަށް ފުރަތަމަ ޑޯޒު ދޭން ފަށާނީ އަންނަ ހޮނިހިރު ދުވަހުކަމަށް ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
މިމަހު 15 ވަނަ ދުވަހުގެ ފަހުން މާލެ ސަރަހައްދުގައި ކޮވިޑް ވެކްސިން ޖެހުން ހުއްޓާލުމަށް ނިންމާފައި ވަނީ ވެކްސިންގެ ދެވަނަ ޑޯޒް ޖަހަން ފަށަން ޖެހޭތީއެވެ. ވެކްސިންގެ ފުރަތަމަ ޑޯޒް ޖެހުން ހުއްޓާލި ނަމަވެސް ބައެއް މީހުންނަށް ވެކްސިން ޖެހޭނެ ކަމަށް އެޗްޕީއޭ އިން ވަނީ އިއުލާނު ކޮށްފައެވެ.
މާޗް 20ގެ ފަހުން ވެކްސިންގެ ފުރަތަމަ ޑޯޒް ޖެހޭނެ މީހުން:
- ބަލިން ރައްކާތެރިވުމަށް ހާއްސަ އިސްކަމެއް ދޭ މީހުން (އުމުރުން ދުވަސް ވީ މީހުންނާއި، ބަލިތަކުގައި އުޅޭ މީހުން)
- ޕޮޒިޓިވްވެ މިހާރު އެކަހެރިވެފައިވާ މީހުން (އެމީހުންނަށް ވެކްސިންޖެހޭނެ ކަމަށް ކަނޑައަޅާފައިވާ މުއްދަތުގައި)
- ކޮންޓެކްޓަށްވެ ކަރަންޓީންގައި ތިބި މީހުން (އެމީހުންނަށް ވެކްސިންޖެހޭނެ ކަމަށް ކަނޑައަޅާފައިވާ މުއްދަތުގައި)
- ރާއްޖެއިން ބޭރުން ދަތުރު ކުރުމަށްފަހު ކަރަންޓީންގައި ތިބި މީހުންނާއި މާލެއިން ދަތުރު ކުރުމަށްފަހު ކަރަންޓީނުގައި ތިބި މީހުން، އަދި
- ބައްޔެއްގެ ސަބަބުން ނުވަތަ ސިއްހީ ހާލަތެއްގެ ސަބަބުން ވެކްސިން ޖެހުން ލަސްކުރަން ޖެހުނު މީހުން މިއެވެ.
ރާއްޖޭގައި ކޮވިޑް އިން ރައްކާތެރިވުމަށް ވެކްސިން ޖަހަން ފަށާފައިވަނީ މިދިޔަ މަހުގެ އެއްވަނަ ދުވަހުއެވެ. ވެކްސިން ޖަހަން ފެށި ފުރަތަމަ ދުވަސްކޮޅު ވެކްސިން ސެންޓަރު ތަކަށް ވެކްސިން ޖަހަން ދިޔަ މީހުންގެ އަދަދު ވަރަށް މަދެވެ. ނަމަވެސް މާލެ ސަރަހައްދުގައި ކޮވިޑް ވެކްސިންގެ ފުރަތަމަ ޑޯޒް ޖެހުން ހުއްޓާލާނެ ވާހަކަ އިއުލާނު ކުރުމާ ގުޅިގެން ވެކްސިން ޖަހަން ކިއު އަށް އެރި މީހުންގެ އަދަދު ވަރަށް ގިނައެވެ.
ރާއްޖެއިން ކޮވިޑް ވެކްސިން ޖެހި މީހުންގެ އަދަދު ވަނީ 212،711 އަށް އަރާފައެވެ. އެގޮތުން އިއްޔެ ވެކްސިން ޖަހާފައި ވަނީ 6597 މީހުންނެވެ. އެއީ މާލެ ސަރަހައްދުން ވެކްސިން ޖެހި 4994 މީހަކާއި އަތޮޅު ތެރެއިން 1603 މީހެކެވެ. މިއާއެކު މާލެ ސަރަހައްދުން ވެކްސިން ޖެހި މީހުންގެ ޖުމްލަ އަދަދު ވަނީ 121،630 އަށް އަރާފައެވެ. އަދި އަތޮޅުތެރޭގައި ވެކްސިން ޖެހި މީހުންގެ ޖުމްލަ އަދަދު ވަނީ 91،081 އަށް އަރާފައެވެ.
ރާއްޖޭގައި ބޭނުން ކުރަމުން އަންނަ ކޮވިޝީލްޑް ވެކްސިންގެ ދެ ވަނަ ޑޯޒް ޖަހަން ނިންމާފައި ވަނީ، ފުރަތަމަ ޑޯޒް ޖަހާތާ 8 ހަފްތާއާއި 12 ހަފްތާއާ ދެމެދުގައި ކަމަށް އެޗްޕީއޭއިން ވަނީ ބުނެފައެވެ. ވެކްސިންގެ ފުރަތަމަ ޑޯޒް ޖެހި މީހުންނަށް ދެ ވަނަ ޑޯޒް ޖަހަން ފަށާނީ އެޕްރީލްގައެވެ.
