ރާއްޖޭގައި ކޮވިޑް އިން ރައްކާތެރިވުމަށް އަންނަ ރޯދަ މަހު ވެކްސިން ޖެހުމުގެ ކަންތައް ކުރިއަށް ދާނީ ރޭގަނޑު ކަމަށް ހެލްތް އިމަޖެންސީ އޮޕަރޭޝަން ސެންޓަރުގެ ތަރުޖަމާން ޑރ. ނަޒްލާ ރަފީގް ވިދާޅުވެއްޖެއެވެ.
ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ވިދާޅުވީ، ރޯދަ މަހު ވެކްސިން ޖެހުމުގެ ކަންތައް ކުރިއަށް ގެންދަން ނިންމާފައިވަނީ ރޭގަނޑު ކަަމަށާއި، ވެކްސިން ޖަހާނެ ގަނޑިތަކާއި ވެކްސިން ޖެހުން ކުރިއަށް ގެންދާނީ ކޮންތަންތަނަކުކަން ރޯދަ މަސް ފެށެން ގާތްވުމުން ހާމަކުރާނެ ކަމަށެވެ.
އެޗްޕީއޭއިން އާންމުކޮށްފައިވާ ތަފާސް ހިސާބުތަކަށް ބަލާއިރު އިއްޔެ 7862 މީހަކު ވަނީ ވެކްސިން ޖަހާފައެވެ. މިއާއެކު ވެކްސިން ޖެހި މީހުންގެ ޖުމްލަ 165،675 އަށް ވަނީ އަރާފައެވެ.
މިހާތަނަށް މާލެއިން ވެކްސިން ޖަހާފައިވާ މީހުންގެ ޖުމްލަ އަދަދަކީ 95،362 އެވެ. އަދި އަތޮޅު ތެރެއިން ވެކްސިން ޖެހި މީހުންގެ ޖުމްލަ އަދަދަކީ 70313 އެވެ.
މިހާރު މާލެ ސަރަހައްދާއި، އައްޑޫ ސިޓީ އަދި ފުވައްމުލައް ސިޓީގައި ވެސް އުމުރުން 18 އަހަރުން މަތީގެ އެންމެނަށް ވެކްސިން ޖަހަން ވަނީ ފަށާފައެވެ. ކޮވިޑް ވެކްސިން ޖަހަން އެޗްޕީއޭއިން ގޮވާލާ އިރު، ކޮވިޑް ވެކްސިންގެ ފުރަތަމަ ޑޯޒް ޖަހާތާ 8 ހަފްތާއާއި 12 ހަފްތާއާ ދެމެދު ދެވަނަ ޑޯޒް ޖަހަން ޖެހޭ ކަމަށާއި އެކަމަށް އެންމެން ސަމާލު ވުމަށް އެޗްޕީއޭއިން ބުނެއެވެ.
މި ދިޔަ މަހުގެ 1 ވަނަ ދުވަހުން ފެށިގެން ކޮވިޑް އިން ރައްކާތެރިވުމަށް ރާއްޖޭގައި ވެކްސިން ޖަހަން ވަނީ ފަށާފައެވެ. ކޮވިޑު-19 އިން ދިފާއުވުމަށް މާލެ ސަރަހައްދުގައި ޖަހަމުންދާ ވެކްސިންގެ ފުރަތަމަ ޑޯޒް ޖަހައި ދޭނީ މިމަހުގެ 15 ވަނަ ދުވަހާ ހަމައަށް ކަމަށް ހެލްތު މިނިސްޓަރު އަހްމަދު ނަސީމް ވަނީ މިދިޔަ ހޯމަ ދުވަހު ވިދާޅުވެފައެވެ.
