ރާއްޖޭގައި ކޮވިޑް އިން ރައްކާތެރިވުމަށް ވެކްސިން ޖެހުމުގެ ޕްރޮގްރާމްގެ ދަށުން މިއަދު 7862 މީހަކު ވެކްސިން ޖަހައިފިއެވެ. މިއާއެކު ވެކްސިން ޖެހި މީހުންގެ ޖުމްލަ 165،675 އަށް ވަނީ އަރާފައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، އިއްޔެ ވެކްސިން ޖެހި މީހުންގެ ތެރެއިން މާލެ ސަރަހައްދުން ވެކްސިން ޖަހާފައި ވަނީ 4083 މީހުން ކަމަށާއި އަތޮޅު ތެރެއިން 3779 މީހަކަށް ވެކްސިން ޖަހާފައިވާ ކަމަށެވެ. މިހާތަނަށް މާލެއިން ވެކްސިން ޖަހާފައިވާ މީހުންގެ ޖުމްލަ އަދަދަކީ 95،362 ކަމަށާއި އަތޮޅު ތެރެއިން ވެކްސިން ޖެހި މީހުންގެ ޖުމްލަ އަދަދަކީ 70313 އެވެ.
މާލެ ސަރަހައްދުގެ 8 ވެކްސިނޭޝަން ސެންޓަރެއްގައި ވެކްސިން ޖެހުމުގެ ކަންކަން ކުރިއަށް ދާއިރު، އަތޮޅުތެރޭގެ 169 ސެންޓަރެއްގައި ވެކްސިން ޖެހުމުގެ ކަންކަން ކުރިއަށް އެބަދެއެވެ. އަދި މޮބައިލް ކޮށް ވެކްސިން ޖަހަމުންދާ 2 ޓީމެއްވެސް މާލެ ސަރަހައްދުގައި ހަރަކާތްތެރި ވެއެވެ.
މިހާރު މާލެ ސަރަހައްދާއި، އައްޑޫ ސިޓީ އަދި ފުވައްމުލައް ސިޓީގައި ވެސް އުމުރުން 18 އަހަރުން މަތީގެ އެންމެނަށް ވެކްސިން ޖަހަން ވަނީ ފަށާފައެވެ. ކޮވިޑް ވެކްސިން ޖަހަން އެޗްޕީއޭއިން ގޮވާލާ އިރު، ކޮވިޑް ވެކްސިންގެ ފުރަތަމަ ޑޯޒް ޖަހާތާ 8 ހަފްތާއާއި 12 ހަފްތާއާ ދެމެދު ދެވަނަ ޑޯޒް ޖަހަން ޖެހޭ ކަމަށާއި އެކަމަށް އެންމެން ސަމާލު ވުމަށް އެޗްޕީއޭއިން ބުނެއެވެ.
މި ދިޔަ މަހުގެ 1 ވަނަ ދުވަހުން ފެށިގެން ކޮވިޑް އިން ރައްކާތެރިވުމަށް ރާއްޖޭގައި ވެކްސިން ޖަހަން ވަނީ ފަށާފައެވެ. ކޮވިޑު-19 އިން ދިފާއުވުމަށް މާލެ ސަރަހައްދުގައި ޖަހަމުންދާ ވެކްސިންގެ ފުރަތަމަ ޑޯޒް ޖަހައި ދޭނީ އަންނަ ހޯމަ ދުވަހާ ހަމައަށް ކަމަށް ހެލްތު މިނިސްޓަރު އަހްމަދު ނަސީމް ވިދާޅުވެފައި ވަނީ މިއަދެވެ.
މީގެ އިތުރުން މިނިސްޓަރު ވަނީ ވެކްސިންގެ ދެވަނަ ޑޯޒް ފުރިހަމަ ކުރުމަށްފަހު ކަރަންޓީން ނުވެ ދަތުރުކުރެވޭނެ ކަމަށްވެސް ވިދާޅުވެފައެވެ.
ވެކްސިން ޖަހަން ފެށީ އިންޑިއާއިން ހަދިޔާ ކުރި ކޮވިޝީލްޑް ވެކްސިން އެފްޑީއޭއިން އެޕްރޫވް ކުރުމާއެކުއެވެ. އޭރު އިންޑިއާއިން ހަދިޔާކުރި ކޮވިޝިލްޑްގެ އެއް ލައްކަ ޑޯޒްގެ ވެކްސިން ހުސްވެފައިވާއިރު، ފަހުން ހަދިޔާ ކުރި އެއް ލައްކަ ޑޯޒްގެ ކޮވިޝީލްޑް ވެކްސިން ރައްޔިތުން ގަޔަށް ޖެހުމުގެ މަސައްކަތް ދަނީ ކުރަމުންނެވެ. މިހާތަނަށް ރާއްޖޭގައި ޖަހާފައި ވަނީ ހަމައެކަނި ކޮވިޝީލްޑް ވެކްސިނެވެ.
