ރާއްޖެއިން މިއަދު ކޮވިޑަށް ޕޮޒިޓިވްވި މީހުންގެ އަދަދު 127 އަށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ، މިއަދު ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 92 މީހަކާއި، އަތޮޅު ތެރެއިން މީހުން ދިރިއުޅޭ ރަށްރަށުން 15 މީހަކާއި ހިންގަމުންދާ ރިސޯޓަކުން 13 މީހަކާއި ހަދަމުންދާ ރިސޯޓަކުން މީހެކެވެ.
މިއާއެކު ރާއްޖެއިން މި ބައްޔަށް ޕޮޒިޓިވްވި މީހުންގެ ޖުމްލަ އަދަދު މިވަނީ 16،783 އަށް އަރާފައެވެ. އޭގެ ތެރެއިން މިއަދު 48 މީހަކު ރަނގަޅުވެފައި ވާއިރު ބަލިން ރަނގަޅުވި ޖުމްލަ މީހުންގެ އަދަދު ވަނީ 14،604 އަށް އަރާފައެވެ. މިވަގުތު މިބަލި ޖެހިފައި ތިބި މީހުންގެ އަދަދު 2117 ގައި އުޅޭ އިރު، އެމީހުންގެ ތެރެއިން 207 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ
މިއަދު ކޮވިޑް ބަލީގައި މަރުވި އުމުރުން 60 އަހަރުގެ މީހާއާއެކު މިހާރު ރާއްޖެއިން ކޮވިޑް ބަލީގައި މަރުވި މީހުންގެ އަދަދު ވަނީ 55 އަށް އަރާފައެވެ. މިހާރު އެއީ 48 ދިވެހިންނާއި 7 ބިދޭސީންނެވެ. އެ ބިދޭސީންގެ ތެރޭގައި ހިމެނެނީ ބަންގްލަދޭޝްގެ 6 މީހަކާއި ޕިލިޕީންސް މީހެކެވެ. މަރުވި 55 މީހުންގެ އިތުރުން ކޮވިޑަށް ޕޮޒިޓިވް ވި 7 މީހަކު މަރުވެފައި ވެއެވެ. އަދި އެ 7 މީހުންނަކީ ކޮވިޑް މަރު ނޫން ކަމަށް އެޗްޕީއޭއިން ވަނީ ނިންމާފައެވެ.
މިއަދު ވަނީ ރާއްޖެއިން ދުބާއީއަށް ޗުއްޓި ހޭދަ ކުރަން ދިޔަ ދިވެހި ފިރިހެނެއް ވެސް ކޮވިޑް ޖެހިގެން މަރުވެފައެވެ. މިއީ މިފަދައިން ރާއްޖެއިން ބޭރަށް ދިޔަ ދިވެއްސަކު ކޮވިޑް ޖެހިގެން މަރުވި ފުރަތަމަ ފަހަރެވެ.
