ކޮވިޑްގެ މިހާލަތުގައި އެއްވެސް މީހަކު ނަމާދު ނިންމުމަށް ފަހު މިސްކިތްތަކުގައި މަޑު ނުކުރުމަށް އިސްލާމިކް މިނިސްޓްރީން އެދިއްޖެއެވެ.
އިސްލާމިކް މިނިސްޓްރީން ބުނީ ކޮވިޑްގެ މިހާލަތުގައި މިސްކިތްތަކަށް ދާ މީހުން ސަމާލުކަން ދޭންޖެހޭ ކަންތައްތަކުގެ ތެރޭގައި ގެއިން ވުޟޫ ކޮށްގެން މިސްކިތަށް ދިއުމާއި މުސައްލަ ގެންދިއުމާއި އެ މީހެއްގެ މުސައްލަ މަތީގައި ނޫނީ ނަމާދު ނުކުރުން ހިމެނޭ ކަމަށެވެ.
އޭގެ އިތުރުން މިސްކިތުގައި މާސްކު އެޅުމަށާއި މިސްކިތަށް ވަނުމާއި ނުކުތުމުގައި ގައިދުރުކަން ބަހައްޓަން ޖެހޭނެ ކަމަށާއި މިސްކިތުގެ އެކި ތަންތަނުގައި ތިބުމުގެ ބަދަލުގައި މިސްކިތަށް ވަންނަ ގޮތަށް ފުރަތަމަ ސަފުން ފެށިގެން ފުރަމުން ގެންދިއުމަށް މިނިސްޓްރީން ވަނީ އެދިފައެވެ.
ހަމައެހެންމެ ފުއްޕާމޭގެ ބަލި ހުންނަ މީހުންނާއި ރޯގާ ޖެހިފައިވާ މީހުންނާއި ހުން އައިސްފައިވާ މީހުންނާއި ކެއްސާ މީހުންނާއި އުމުރުން ދުވަސްވެފައިވާ މީހުން މިހާލަތުގައި މިސްކިތަށް ނުދިއުމަށް މިނިސްޓްރީން ވަނީ އެދިފައެވެ.
މިނިސްޓްރީން އިތުރަށް ބުނީ ނަމާދު ނިމުމަށްފަހު މިސްކިތުގައި މަޑު ނުކުރުމަށާއި މިސްކިތުގައި އަދި މިސްކިތުން ބޭރުގައި ވެސް އަތާ އަތްޖޯޑުކޮށް ސަލާމް ކުރުން ފަދަ ކަންކަން ކުރުމުން ދުރުވުމުން މުހިންމު ކަމަށެވެ. އަދި މިސްކިތުގައި ބަހައްޓާފައި ހުންނަ ހަތިމުތައް ބޭނުން ނުކުރުމަށް ވެސް މިނިސްޓްރީން ވަނީ އެދިފައެވެ.
އެޗްޕީއޭއޭ ގެ ގައިޑް ލައިންއާ އެއްގޮތަށް އަމަލު ކުރުމަށް ހުރިހާ ފަރާތްތަކަށް ވެސް މިނިސްޓްރީން ވަނީ އިލްތިމާސް ކޮށްފައެވެ.
އޭގެ އިތުރުން މިނިސްޓްރީން ވަނީ މި ދަނޑިވަޅުގައި ވެސް ކަމާބެހޭ ފަރާތްތަކުން ދޭ އިރުޝާދުތަކާ އެއްގޮތަށް އަމަލު ކުރުމަށާއި ފަރުޟު ނަމާދާއި ސުންނަތް ނަމާދުތައް ބަރާބަރަށް އަދާ ކުރުމަށާއި ކީރިތި ޤުރުއާން ކިޔަވާ ﷲ ގެ ރަހުމަތުން މާޔޫސްނުވެ، ސަބަބު ތަކުގައި ހިފައި ފުރިހަމައަށް ﷲ އަށް ވަކީލް ކޮށް ގިނަ ގިނައިން ދުއާކޮށް، އަސްތަޣުފާރު ކުރުން މަތީ ދެމި ތިބުމަށް ހުރިހާ ރައްޔިތުންނަށް ނަސޭހަތްތެރި ވެފައެވެ.
