ޔުޓިލިޓީ ރެގިއުލޭޓަރީ އޮތޯރިޓީގެ ޗީފް އެގްޒެކްޓިވްގެ މަގާމަށް ޔަޒީދު އަހުމަދު ހަމަޖައްސައިފިއެވެ.
ޔޫޓިލިޓީ ރެގިއުލޭޓަރީ އޮތޯރިޓީއަކީ، ކަރަންޓާއި، ފެނާއި ނަރުދަމާ އަދި ކުނި މެނޭޖްކުރުމުގެ ހިދުމަތްތައް ރެގިއުލޭޓް ކުރަން އުފައްދާފައިިވާ ތަނެކެވެ. އެ އޮތޯރިޓީގެ ސީއީއޯ ކަމަށް ސިވިލް ސާވިސް ކޮމިޝަނުން ޔަޒީދު އައްޔަން ކޮށްފައި ވަނީ މިއަދެވެ.
ޔުޓިލިޓީ ރެގިއުލޭޓަރީ އޮތޯރިޓީ ސީއީއޯގެ މަގާމަށް ޔަޒީދު އައްޔަން ކޮށްފައި ވާއިރު އޭނާ އެންމެ ފަހުން ހުންނެވީ ވެސް ޔުޓިލިޓީ އޮތޯރިޓީގެ ޑިރެކްޓަރުގެ މަގާމުގައެވެ.
ޔަޒީދު ވަނީ ސަރުކާރުގެ އެކި މަގާމުތަކުގައި 17 އަހަރު ހިދުމަތް ކުރައްވާފައެވެ. އެގޮތުން ޔަޒީދު ވަނީ މީގެ ކުރިން، ޔުޓިލިޓީ އޮތޯރިޓީގެ ޑިރެކްޓަރުގެ މަގާމުގެ އިތުރުން އެންވާރަންމެންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރުގެ މަގާމު ވެސް ފުރުއްވާފައެވެ.
ޔަޒީދު ވަނީ ތިމާވެއްޓާއި ފެނާއި ނަރުދަމާގެ ސިވިލް އިންޖިއަރިން ދާއިރާއިން މާސްޓާސް ޑިގްރީއެއް ހާސިލު ކުރައްވާފައެވެ.
އޭނާ ޔޫޓިލިޓޯ އޮތޯރިޓީގެ ސީއީއޯގެ މަގާމަށް އައްޔަން ކުރުމާ ގުޅިގެން އެންވާރަންމަންޓް މިނިސްޓަރު ޑރ. ހުސައިން ރަޝީދު ހަސަން ވަނީ މިއަދު އޭނާއާ ބައްދަލު ކުރައްވާފައެވެ. އަދި ޔުޓިލީ ދާއިރާގެ ރެގިއުލޭޓަރީ މަސައްކަތްތައް ހަރުދަނާކޮށް ތަރައްގީކޮށް ދެއްވުމަށް މިނިސްޓަރު ވަނީ އެދިވަޑައިގަންނަވާފައެވެ.
