ހުޅުމާލެ ޖަލުން 31 ގައިދީން ޕޮޒިޓިވް ވެއްޖެއެވެ.
އެޗްއީއޯސީން ބުނީ މިމަހު އެއް ވަނަ ދުވަހު ހުޅުމާލެ ޖަލުން އަލާމާތްތައް ހުރި ގައިދީއެއް ފެނިފައިވާ ކަމަށާއި މި ކޭސްއާ ގުޅިގެން ގައިދީންނާއި ސްޓާފުން ހިމެނޭ ގޮތަށް ނެގި 112 ސާމްޕަލްގެ ތެރެއިން 31 ސާމްޕަލް ޕޮޒިޓިވް ވެފައި ވާ ކަމަށެވެ.
އެގޮތުން މިހާތަނަށް ޕޮޒިޓިވް ވެފައި ވަނީ ގައިދީން އެކަނި ކަމަށް އެޗްއީއޯސީން ވަނީ ބުނެފައެވެ.
އެޗްއީއޯސީން ބުނީ ޕޮޒިޓިވް ކޭސްތައް އެކަހެރި ކުރެވިފައިވާ ކަމަށާއި އަދި ކޮންޓެކްޓުން ކަރަންޓީން ކުރެވިފައިވާ ކަމަށެވެ.
ހުޅުމާލެ ޖަލުން ކޮވިޑް ކޭސްތައް ފެންނަމުން ދާއިރު ރާއްޖެއިން އިއްޔެ 121 މީހަކު ވަނީ ކޮވިޑަށް ޕޮޒިޓިވް ވެފައެވެ.
އިއްޔެ ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 102 މީހަކާއި، އަތޮޅު ތެރެއިން މީހުން ދިރިއުޅޭ ރަށްރަށުން 4 މީހަކާއި ހިންގަމުންދާ ރިސޯޓަކުން 15 މީހަކެވެ.
ރާއްޖެއިން މި ބައްޔަށް ޕޮޒިޓިވްވި މީހުންގެ ޖުމްލަ އަދަދު މިވަނީ 16،276 އަށް އަރާފައެވެ. އަދި ބަލިން ރަނގަޅުވި ޖުމްލަ މީހުންގެ އަދަދު ވަނީ 14،337 އަށް އަރާފައެވެ. މިވަގުތު މިބަލި ޖެހިފައި ތިބި މީހުންގެ އަދަދު 1879 ގައި އުޅޭ އިރު، އެމީހުންގެ ތެރެއިން 178 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ.
