ކޮވިޑާ ގުޅިގެން އަޅާ ރައްކާތެރިކަމުގެ ފިޔަވަޅެއްގެ ގޮތުން މާދަމާ ރެއިން ފެށިގެން، ރޭގަނޑު 8:30 އިން ފަތިހު 4:30 އަށް އެއްގަމު އުޅަނދު ދުއްވުން މަނާ ކޮށް، ރޭގަނޑު 11 އިން ފަތިހު 4:30 އަށް ކާފިއު އިއުލާން ކޮށްފިއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހެލްތް އެމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ފާތުމަތު ނަޒުލާ ރަފީޤު ވިދާޅުވީ ކޮވިޑް ކޭސްތައް އިތުރުވުމުގެ ސަބަބުން އެޗްޕީއޭއިން އަޅާފައިވާ ފިޔަވަޅުތައް ވަރުގަދަ ކުރުމަށް ނިންމާފައިވާ ކަމަށެވެ.
އެގޮތުން ރޭގަނޑު 8:30 އިން ފެށިގެން ފަތިހު 4:30 އަށް މާލެ ސަރަހައްދުގައި އެއްގަމު އުޅަނދު ފަހަރު ދުއްވަން ކުރިއަށް އޮތް ދެ ހަފްތާއަށް މަނާ ކޮށްފައި ވާއިރު ރޭގަނޑު 11 އިން ފެށިގެން ފަތިހު 4:30 އަށް މާލެ ސަރަހައްދުގައި ކާފިއު ގަޑި ވަނީ އިތުރު ކޮށްފައެވެ.
މީގެ އިތުރުން އެޗްޕީއޭ އިން ވަނީ ޕްރީ ސްކޫލްތަކާއި ނާސަރީތަކާއި ޑޭކެއާ ހިޚިދުމަތް ބަންދުކުރަން ނިންމާފައެވެ. އަދި ޔުނިވާސިޓީތަކާއި ކޮލެޖް ފަދަ ތަންތަނުގެ ކިޔަވައި ދިނުން ކުރިއަށް އޮތް 2 ހަފްތާގައި އޮންލައިކޮށް ކުރިއަށް ގެންދިއުމަށް ވެސް އެޗްޕީއޭ އިން ވަނީ އަންގާފައެވެ.
ހަމައެހެންމެ ރައްކާތެރިކަމުގެ ފިޔަވަޅުތަކަށް ގެނައި ބަދަލާއެކު މީހުން ދިރިއުޅޭ ހުރިހާ ރަށެއްގައި އާއްމު ތަންތަނުގައި އުޅޭއިރު މާސްކް އެޅުމަކީ ވެސް މަޖުބޫރު ކަމެއްގެ ގޮތުގައި މިހާރު ވަނީ ކަނޑައަޅާފައެވެ.
