އާއިލާއިން ގެއްލިގެން ރިޕޯޓު ކުރި ޒުވާނާ ގެއިން ނުކުމެގެން ދިޔައީ އަމިއްލައަށް، އާއިލާއާ މެދު ހުރި ހިތްހަމަ ނުޖެހުންތަކަކާ ގުޅިގެން ކަމަށް ފުލުހުން ބުނެފިއެވެ.
ފުލުހުން ބުނީ 21 އަހަރުގެ އަންހެނަކު ގެއްލިފައިވާ ކަމަށް ރޭ 8:30 ހާއިރު ފުލުހުންނަށް ރިޕޯޓު ކޮށްފައި ވާ ކަމަށާއި ނަމަވެސް އެ މައްސަލައާ ގުޅިގެން މިހާތަނަށް ބެލި ބެލުމުން އޭނާ ގެއްލިފައިވާ ނުވާ ކަމަށެވެ.
އަދި އޭނާ ގެއިން ނުކުމެގެން ގޮސްފައި ވަނީ އާއިލާއާ މެދު ހުރި ހިތްހަމަ ނުޖެހުން ތަކެއްގެ ސަބަބުން އަމިއްލައަށް ކަން އެނގިފައިވާ ކަމަށްވެސް ފުލުހުން ބުނެއެވެ.
އެ މައްސަލަ ފުލުހުން ތަހުގީގު ކުރަމުން ދާއިރު، ބައެއް މީޑިއާތަކުން ރިޕޯޓު ކޮށްފައިވާ ގޮތުގައި އެ އަންހެން މީހާ ގެންގޮސްފައި ވަނީ "ބްލެކްމެއިލް" ކޮށްގެން އޭނާ ލޯބީގެ ގޮތުން ގުޅިގެން އުޅޭ މީހެއް ކަމަށް އާއިލާއިން ތުހުމަތު ކޮށްފައިވާ ކަމަށެވެ.
ނަމަވެސް ފަހުން އެ ޒުވާނާ ސޯޝަލް މީޑިއާގައި ބުނެފައި ވަނީ އޭނާގެ އަގު ވައްޓާލުމަށް ދޮގު މައުލޫމާތު ފަތުރަމުން ދަނީ އާއިލާ އިން ކަމަށެވެ. އަދި އާއިލާއިން ލޯބިވެރިޔާއާ ދުރުކުރުމަށް ސިހުރު ހަދަން މަސައްކަތް ކުރި ކަމަށްވެސް ވަނީ ތުހުމަތު ކޮށްފައެވެ.
