ރަޝިއާގެ ރައީސް ވްލޭޑްމިއާ ޕޫޓިންއަށް ބޮޑެތި ފާޑުކިއުންތަކެއް އަމާޒު ކުރަމުން ދަނިކޮށް ވިހަކޮށްލި އެ ގައުމުގެ އިދިކޮޅު ލީޑަރު އެލެކްސީ ނަވާލްނީ، ފަރުވާއަށް ފަހު އެނބުރި ގައުމަށް ދިއުމުން ހައްޔަރު ކޮށްފިއެވެ.
ރަޝިއާގެ ސަރުކާރުން ތަރައްގީ ކުރާ ނާވް އޭޖެންޓް (ނޮވިޗޯކް) ބޭނުން ކޮށްގެން ވިހަ ކޮށްލި ނަވާލްނީ، ރަޝިއާއަށް އެނބުރި ދިޔައީ 5 މަހެއްހާ ދުވަސް ވަންދެން ޖަރުމަނުވިލާތުގައި ފަރުވާ ހޯދުމަށް ފަހުގައެވެ.
އުމުރުން 44 އަހަރުގެ ނަވާލްނީ ހައްޔަރުކޮށް، ފުލުހުންގެ ބެލުމުގެ ދަށަށް ގެންދިޔައީ ޝްރެމެޓެޔެވޯ އެއާޕޯޓުގެ ޕާސްޕޯޓް ކޮންޓްރޯލް ޔުނިޓް ސަރަހައްދުންނެވެ.
އޭރު އެތައް ހާސް ބަޔަކު ވަނީ ނަވާލްނީއަށް ސަޕޯޓް ކުރުމަށް، ވެރިރަށް މޮސްކޯގެ އެހެން އެއާޕޯޓަކަށް ޖަމާވެފައެވެ. ނަވާލްނީ ދަތުރު ކުރަމުން ދިޔަ މަތިންދާބޯޓު، އޭނާ ހައްޔަރު ކުރި އެއާޕޯޓަށް ޑައިވާޓް ކުރީ ކަމަށް ހަބަރު ލިބެއެވެ.
ފުރާނަ ގެއްލިދިއުމުގެ ތުންފަތްމައްޗަށް ނަވާލްނީ ވައްޓާލި ވިހަ ދިނުމުގެ ފަހަތުގައި އޮތީ ޕޫޓިންގެ ސަރުކާރު ކަމަށް ނަވާލްނީއާ އޭނާގެ ސަޕޯޓަރުން ވަކާލާތު ކުރެއެވެ. ނަމަވެސް، މި ދައުވާއަށް ޕޫޓިން އިންކާރު ކުރައްވައެވެ.
އެމެރިކާގެ ވެރިކަމާ ދެން ހަވާލުވެވަޑައިގަންނަވާ ޖޯ ބައިޑަންގެ ގައުމީ ސަލާމަތާ ބެހޭ މުޝީރު، ޖޭކް ސަލިވާންވެސް ވަނީ މިކަމުގައި ރަޝިއާގެ ސަރުކާރަށް ފާޑުވިދާޅުވެފައެވެ. އަދި މިއީ ހަމައެކަނި ނަވާލްނީއަށް ދިން ހަމަލާއެއް ނޫން ކަމަށާ، މިއީ އަޑު އިއްވަން ބޭނުން ވެފައި ތިބި ރަޝިއާގެ ރައްޔިތުންނަށް ދިން އަނިޔާއެއް ކަމަށްވެސް ސަލިވާން ވަނީ ސިފަކުރައްވާފައެވެ.
2020 ވަނަ އަހަރުގެ އޯގަސްޓް މަހު ނަވާލްނީ ވިހަކޮށްލި ހާދިސާއަށް ފަހު އިތުރު ފަރުވާ ހޯދަމުން ދިޔައީ ޖަރުމަނުވިލާތުގައެވެ. ނަމަވެސް ނަވާލްނީ ވަނީ އެނބުރި ރަޝިއާއަށް ދާނެ ކަމަށް ބުނެފައެވެ. އަދި ނަވާލްނީ ވަނީ އެކަން ސާބިތުވެސް ކޮށްދީފައެވެ.
ނަވާލްނީއާއެކު އެއް ފްލައިޓެއްގައި ނޫސްވެރިންވެސް ދަތުރުކުރިއެވެ. އަދި ޓެކްނިކަލް މައްސަލައަކާ ހެދި ކަމަށް ބުނެ ބޯޓު ޖެއްސި ވައިގެ ބަނދަރު ބަދަލު ކުރުމުން ފަސެންޖަރުންގެ މެދުގައި ނުތަނަވަސްކަން އުފެދުނު ކަމަށް ހަބަރު ލިބެއެވެ.
ވައިގެ ބަނދަރުން އޭނާ ހައްޔަރު ކުރި ނަމަވެސް، އޭނާ ބިރު ގަންނަ ކަމެއް ނެތް ކަމަށް ނަވާލްނީ ވަނީ ބުނެފައެވެ. އޭރު ފުލުހުން ދިޔައީ، ނަވާލްނީ ގަދަ ދައްކާ ނަމަ ބާރުގެ ބޭނުން ކުރާނެ ކަމުގެ އިންޒާރު ދެމުންނެވެ. ނަވާލްނީ ހައްޔަރުކުރި އިރު، ވަކީލަކު ގެންދިއުމުގެ ފުރުސަތު އޭނާއަށް ދީފައެއް ނުވެއެވެ. ނަވާލްނީ ހައްޔަރުކޮށްފައި ހުރީ މޮސްކޯގެ ފުލުހުންގެ އިދާރާއެއްގައެވެ.
ރަޝިއާގެ ޕްރިޒަންސް ޑިވިޝަނުން ނެރުނު ބަޔާނެއްގައި ބުނެފައި ވަނީ، އިދިކޮޅު ލީޑަރު ނަވާލްނީ އަކީ 2020 ވަނަ އަހަރުގެ ޑިސެމްބަރު މަހުގެ 20 ވަނަ ދުވަހުން ފަށައިގެން ހޯދަން ބޭނުން ވެފައިވާ މީހެއް ކަމަށެވެ. އޭނާ ހޯދަމުން ދަނީ، ސިލްސިލާ ގޮތެއްގައި ޕްރޮބޭޝަނާ ހިލާފު ވެގެން ކަމަށްވެސް ޕްރިޒަންސް ޑިވިޝަނުން އާންމު ކުރި ބަޔާނުގައިވެއެވެ. ކޯޓުން ވަކި ގޮތެއް ނިންމަންދެން ނަވާންލީ ހުންނާނީ ހައްޔަރު ކޮށްފައި ކަމަށްވެސް އެ ބަޔާނުގައިވެއެވެ.
ރަޝިއާގެ ކަމާ ބެހޭ ފަރާތްތަކުން ނަވާލްނީ ހޯދަނީ، ހިޔާނާތުގެ މައްސަލައެއްގައި ބަންދުގެ މުއްދަތު ޖަހާފައި ވަނިކޮށް އެ އަމުރާ ހިލާފު ވި ކަމަށް ބުނެއެވެ. ނަވާލްނީ ބުނަމުންދަނީ އެ އަމަރަކީ ސިޔާސީ އަމުރެއް ކަމަށެވެ. ރަޝިއާގެ ޕްރޮސެކިއުޓަރުން ވަނީ ނަވާލްނީއާ ދެކޮޅަށް އިތުރު މައްސަލައެއްވެސް ބަލަން ފަށާފައެވެ. އެއީ ފްރޯޑްގެ ދައުވާތަކެކެވެ.
ނަވާލްނީ ސިފަ ކުރާ ގޮތުގައި މި ދައުވާތަކަކީ އޭނާއަށް ރަޝިއާއިން ފުރުސަތެއް ނުދިނުމަށް ޕޫޓިން ކުޅުއްވާ ކުޅިއެކެވެ. ނަމަވެސް ރަޝިއާގެ ކަމާ ބެހޭ ފަރާތްތަކުން ބުނަމުން ދަނީ ނަވާލްނީއަށް އެ ގައުމުގައި ތާއީދެއް ނެތް ކަމަށާ، ނަވާލްނީއަކީ ޕޫޓިންއަށް ހުރި ބިރެއް ނޫން ކަމަށެވެ.
ޖަރުމަނުވިލާތުގައި ފަރުވާ ހޯދަމުން ދިޔަ ދުވަސްވަރު ނަވާލްނީ ވަނީ އޭނާއަށް ވިހަ ދިން ގޮތުގެ ތަފްސީލީ ތަހުގީގުތަކެއް އޭނާ އަމިއްލައަށް ހިންގާ، ބައިނަލްއަގުވާމީ މީޑިއާއަށް އާންމު ކޮށްފައެވެ.
