އޭޝިއާގެ ސުޕާޕަވަރުގެ މަގާމަށް ވަކާލާތު ކުރަމުން އަންނަ ޗައިނާއާއި އިންޑިއާ ހިއްސާކުރާ ބޯޑަރު ސަރަހައްދުގައި ޗައިނާ އަސްކަރިއްޔާގެ 60000 އެއްހާ ސިފައިން ރުކުރުވާލާފައި ވާ ކަމަށް އެމެރިކާގެ ހާރިޖީ ވަޒީރު މައިކް ޕޮމްޕޭއޯ ހާމަ ކުރައްވައިފިއެވެ.
ބޯޑަރު މައްސަލާގައި ޗައިނާއާއި އިންޑިއާ ދެމެދު ސިލްސިލާ ގޮތެއްގައި އަރާރުންވަމުން އަންނަތާ އަހަރުތަކެއް ވެފައި ވީ ނަމަވެސް، މި އަހަރުގެ މެއި މަހުން ފަށައިގެން މި ނުތަނަވަސްކަން ވަނީ އިންތިހާއަށް ބޮޑުވެފައެވެ. ދެ ގައުމުގެ މެދުގައި އަސްކަރީ ކުރިމަތިލުމަކަށް ދިޔަ މަންޒަރުވެސް ފެނިފައި ވާއިރު، މިމައްސަލާގައިވެސް އެމެރިކާގެ ތާއީދު އޮތީ އިންޑިއާއަށް ކަން އެމެރިކާގެ ހާރިޖީ ވަޒީރު ވަނީ ހާމަ ކުރައްވާފައެވެ.
ޕޮމްޕޭއޯ ވިދާޅުވީ މިމައްސަލާގައި އިންޑިއާގެ ބައިވެރިއަކަށް އެމެރިކާވުން އެ ގައުމަށް ކޮންމެހެން ބޭނުން ވެފައި ވާ ކަމަށެވެ.
ފޮކްސް ނިއުސްއަށް ދެއްވި ބަސްދީގަތުމެއްގައި މިފަދަ ރޫހެއްގައި ޕޮމްޕޭއޯ ވާހަކަދައްކަވާފައި މިވަނީ، އިންޑޯ-ޕެސިފިކް ސަރަހައްދުގެ ގަވައިދުތަކާ ބެހޭ ގޮތުން އިންޑިއާ، ޖަޕާން، އޮސްޓްރޭލިއާ އަދި އެމެރިކާ ބައިވެރިވެގެން ހުސްވި ހަފުތާގައި މަޝްވަރާތަކެއްވެސް ކުރިއަށް ގެންގޮސްފައި ވާ ދަނޑިވަޅެއްގައެވެ. މި މަޝްވަރާތަކަކީ އިންޑޯ-ޕެސިފިކް ސަރަހައްދަށް އަތްގަދަ ކުރުމަށް ޗައިނާއިން ކުރަމުން އަންނަ މަސައްކަތްތަކާ ދެކޮޅަށް ދެވުނު މެސެޖެއްގެ ގޮތުގައިވެސް ސިފަކުރެވެއެވެ.
