ނޮވެމްބަރު މަހުގެ 3 ވަނަ ދުވަހު އެމެރިކާގައި ކުރިއަށް ގެންދާ ރިޔާސީ އިންތިހާބާ ދިމާކޮށް އެގައުމުގައި އޮންނަ ރިޔާސީ ބަހުސްގެ ފުރަތަމަ ބުރަށް ވަޑައިގަތުމުގެ ކުރިން، ޑްރަގް ޓެސްޓުގެ ރިޕޯޓް ހުށަހެޅުއްވުމަށް، ދެވަނަ ދައުރަކަށް ފައިވިއްދަވައިގެން ހުންނެވި މިހާރުގެ ރައީސް ޑޮނާލްޑް ޓްރަމްޕް، އޭނާގެ ސިޔާސީ ވާދަ ވެރިޔާ، އަދި އިދިކޮޅު ޑިމޮކްރަޓިކް ކެންޑިޑޭޓް ޖޯ ބައިޑަންއަށް ގޮންޖައްސަވައިފިއެވެ.
އަންނަ މަހު އޮންނަ ފުރަތަމަ ރިޔާސީ ބަހުސްގެ ކުރިން، ޚުދު އެމަނިކުފާނުވެސް ޑްރަގް ޓެސްޓު ހައްދަވާނެ ކަމަށް ޓްރަމްޕް ވަނީ ވިދާޅުވެފައެވެ.
ވޮޝިންގްޓަން އެގްޒެމިނާއަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ، ޓީވީން ދުރަށް ފޮނުވަމުންދާ ޑިމޮކްރަޓިކް ޕާޓީގެ ބަހުސްތަކަށް ބަލާއިރު، ބައިޑަންގެ ހުށަހެޅުންތެރިކަން އިހުނަށްވުރެ ބޮޑުތަނުން ކުއްލި ގޮތަކަށް އިސްލާހުވެފައިވާތީ ފާހަގަ ކުރެވޭ ކަމަށެވެ. ނަމަވެސް، އިދިކޮޅު ކެންޑިޑޭޓަކީ އެއްވެސް ކަހަލަ ޑްރަގެއްގެ ބޭނުން ކުރައްވަމުންދާ ކެންޑިޑޭޓެއް ކަމަށް ބާރުދޭ އެއްވެސް ހެއްކެއްގެ ތަފްސީލެއް ޓްރަމްޕް ދެއްވާފައެއް ނުވެއެވެ.
ރިޔާސީ އިންތިހާބުގެ ކުރިން ބައިޑަންއާއި ޓްރަމްޕް، 3 ފަހަރެއްގެ މަތިން ބަހުސް ޕޯޑިއަމްއިން ބައްދަލުކުރައްވާނެއެވެ.
2016 ވަނަ އަހަރުވެސް ޓްރަމްޕް ވަނީ މިފަދަ ކަމެއް ކުރައްވާފައެވެ. އެގޮތުން އެ ފަހަރުގެ ވާދަވެރިޔާ، ހިލަރީ ކްލިންޓަންވެސް ޑްރަގެއް ބޭނުން ކުރައްވާ ކަމަށް ނުސީދާ ގޮތެއްގައި ތުހުމަތު ކުރައްވަމުން ޓްރަމްޕް ވަނީ ޑްރަގް ޓެސްޓެއް ހެދުމަށް ހިލަރީއަށް ގޮންޖައްސަވާފައެވެ. ނަމަވެސް ކްލިންޓަން ކެމްޕޭނުންވަނީ އެކަމަށް ފުރަގަސް ދީފައެވެ.
ބަހުސްގެ ޕޯޑިއަމްގައި ބައިޑަންއާއި ޓްރަމްޕްގެ ފުރަތަމަ ކުރިމަތިލުން އޮންނާނީ ސެޕްޓެމްބަރު މަހުގެ 29 ވަނަ ދުވަހު ކްލީވްލަންޑް، އޯހައިއޯގައެވެ. އޭގެ ފަހުން، އޮކްޓޯބަރު 15 ގައި މައޭމީ، ފްލޮރިޑާ އަދި އޮކްޓޯބަރު 22 ވަނަ ދުވަހު ނޭޝްވިލް، ޓެނަސީގައިވެސް 2 ބޭފުޅުން ބަހުސް ކުރައްވާނެއެވެ.
ޓްރަމްޕް ވަނީ ބައިޑަންއާއި ކުރިމަތިލެއްވުމަށް އިތުރު ބަހުސްތަކަކަށްވެސް އެދިވަޑައިގެންފައެވެ. ނަމަވެސް ރިޔާސީ އިންތިހާބުގެ ބަހުސްތަކާ ބެހޭ ކޮމިޝަނުން ވަނީ އެ ހުށަހެޅުމަށް އިންކާރު ކޮށްފައެވެ.
