ކޮވިޑް-19 ހަލުވި ކަމާއެކު ފެތުރެމުންދާއިރު އަތޮޅު ތެރެއިން ވެސް މިހާރު ވަނީ ޕޮޒިޓިވް ކޭސްތައް ގިނަ އަދަދަކަށް ފެންނަން ފަށާފައެވެ. އެގޮތުން އަތޮޅު ތެރެއިން މިހާރު 64 ޕޮޒިޓިވް ކޭސް ފެނިފައި ވާއިރު އޭގެ ތެރެއިން 58 މީހުންނަކީ ދިވެހިންނެވެ.
ކޮވިޑް-19 އަތޮޅު ތެރެއިން ޕޮޒިޓިވް މީހުންގެ ތެރޭގައި 58 ދިވެހިން ހިމެނޭއިރު 6 މީހުންނަކީ ބިދޭސީންނެވެ. އޭގެ ތެރެއިން ސ. ފޭދޫއިން ކޮންޓެކްޓް ވެ ޕޮޒިޓިވް ވި އެކަކު ފިޔަވާ އެންމެންނަކީ ފުރަބަންދު ކަރަންޓީނުގައި ތިބި މީހުން ކަމަށް އެޗްޕީއޭ އިން ބުނެއެވެ.
މިހާރު މި ބައްޔަށް ފަރުވާ ކުރަމުންދާ ނުވަތަ އެކްޓިވް ކޭސްތައް އުޅެނީ މާލެ ސަރަހައްދުގެ އިތުރުން، ރާއްޖޭގެ 32 ރަށެއްގައެވެ. އެއީ ގއ. ވިލިނގިލި، ރ. ހުޅުދުއްފާރު، ސ. ފޭދޫ، ސ. ހިތަދޫ، ކ. ތުލުސްދޫ، ފ. ނިލަންދޫ، ހދ. ކުރިނބި، ކ. ހިންމަފުށި، ނ. މިލަދޫ، އދ. މާމިނގިލި، ވ. ކެޔޮދޫ، ތ. މަޑިފުށި، ތ. ވިލުފުށި، ވ. ތިނަދޫ، ޅ. ހިންނަވަރު އަދި ތ. ތިމަރަފުށި، އދ. އޮމަދޫ، ރ. އިނގުރައިދޫ، ކ. ގުޅި، ރ. ދުވާފަރު، ލ. ގަން، ތ. އޮމަދޫ، ރ. ކިނޮޅަސް، ދ. ރިނބިދޫ، ފ. ދަރަނބޫދޫ، މ. މުލަށް، ބ. އޭދަފުށި، ކ. މާފުށި، ފ. ބިލެއްދޫ، ކ. ދިއްފުށި، ގއ. ވިލިނގިލި، ސ. މަރަދޫ އަދި ކ. ގުރައިދޫ އެވެ.
މިރަށްތަކުގެ ތެރެއިން އެންމެ ގިނަ ކޭސްތައް ފެނިފައިވަނީ ފ. ނިލަންދޫ އިންނެވެ. އެގޮތުން އެރަށުން މިހާތަނަށް 7 ކޭސް ވަނީ ފެނިފައެވެ.
މިއަދު 135 މީހުން ވަނީ ކޮވިޑަށް ޕޮޒިޓިވް ވެފައެވެ. މިއަދު ޕޮޒިޓިވްވި 135 މީހުންގެ ތެރެއިން 126 މީހުންނަކީ މާލެ ސަރަހައްދުން ޕޮޒިޓިވްވި މީހުންނެވެ. އަދި 9 މީހުންނަކީ އަތޮލޫތެރެއިން ޕޮޒިޓިވްވި މީހުންނެވެ.
މިއަދު ކޮވިޑަށް ޕޮޒިޓިވްވި މީހުންގެ ތެރޭގައި ހިމެނެނީ، 109 ދިވެހިންނާއި، ބަންގްލަދޭޝަށް ނިސްބަތްވާ 15 މީހަކާއި އިންޑިއާގެ 8 މީހަކާއި އީޖިޕްޓުގެ 2 މީހަކާއި އަދި ނޭޕާލްގެ މީހެކެވެ.
