އެމެރިކާގެ އަދުގެ ރައީސް ޑޮނާލްޑް ޓްރަމްޕްގެ ވެރިކަމުގައި އެ ގައުމު އޮތީ އަނދިރިކަމުގެ ފޭރާމެއްގެ ފަހަރުގައި ފަރުދާކޮށްފައި ކަމަށް، އެމެރިކާގެ ކުރީގެ ނައިބު ރައީސް، ޓްރަމްޕްގެ ސިޔާސީ ވާދަވެރިޔާ ޖޯ ބައިޑަން ވިދާޅުވެއްޖެއެވެ.
ޖޯ ބައިޑަން، މިފަދަ މޭރުމަކުން ޓްރަމްޕަށް ބަހުގެ ހަމަލާއެއް ދެއްވާފައި މިވަނީ ނޮވެމްބަރު މަހު އެމެރިކާގައި އޮންނަ ރިޔާސީ އިންތިހާބުގައި ޓްރަމްޕާ ދެކޮޅަށް، އިދިކޮޅު ޑިމޮކްރަޓުން ފަރާތުން ނިކުންނަވާ ކެންޑިޑޭޓް ކަމުގެ ޓިކެޓް ރަސްމީކޮށް ގަބޫލުކުރައްވާ، ޑިމޮކްރަޓިކް ކޮންވެންޝަންގައި ވާހަކަދައްކަވަމުންނެވެ.
ޑިމޮކްރަޓިކް ކޮންވެންޝަންގައި ޓްރަމްޕަށް ހަމަލާތައް އަމާޒު ކުރައްވަމުން ބައިޑަން ވިދާޅުވީ، ޓްރަމްޕްގެ ވެރިކަމުގައި އެމެރިކާގައި އިންތިހާ ނަފުރަތާ، ބިރުވެރިކަމާ، ބައިބައިވުންތައް އުފައްދާފައިވާކަމަށެވެ.
މިހާތަނަށް ކުރިއަށް ގެންގޮސްފައިވާ ހިޔާލު ހޯދުމުގެ ވޯޓުތަކުގެ ނަތީޖާއަށް ބަލާއިރު، ބައިޑަންއަށް އޮތް ތާއީދު ބޮޑެވެ. ނަމަވެސް އިންތިހާއަށް އޮތް 75 ދުވަހަކީ، އުމުރުފުޅުން 74 އަހަރުގެ ޓްރަމްޕަށް ތާއީދު ކަށަވަރު ކުރުމަށް އޮތް ފުރުސަތެއް ކަމުގައިވެސް ބަލަންޖެހެއެވެ.
ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމާއެކު މުޅިންހެން ފަޅަށް އޮތް މާލަމެއްގައި ހުންނަވާ، ތަގުރީރު ކުރައްވަމުން، އުމުރުން 77 އަހަރުގެ ބައިޑަން ވަނީ އޭނާއަށް ވޯޓު ދިނުމަށް އެމެރިކާގެ ރައްޔިތުންގެ އެދިވަޑައިގެންފައެވެ. އޭނާގެ ވެރިކަމެއްގައި ފެނިގެންދާނީ ހުރިހާ ގޮތަކުންވެސް އެންމެ ރަނގަޅު އެމެރިކާ ކަމުގެ ޔަގީންކަން ބައިޑަންވަނީ އެމެރިކާގެ ރައްޔިތުންނަށް ދެއްވާފައެވެ.
ބައިޑަންގެ ވެރިކަމެއް ވެގެންދާނީ އަލިކަމުގެ ރާސްތާއަކަށް ކަމަށްވެސް އޭނާ ވަނީ ސިފަކުރައްވާފައެވެ. ކުރިއަށް އޮތް އިންތިހާބަކީ ދިރިއުޅުން ބަދަލު ކޮށްލާނެ އިންތިހާބެއް ކަމަށާ، އެ އިންތިހާބަކީ ދިގު މުއްދަތުގެ ރާސްތާގައި އެމެރިކާގެ މުސްތަގުބަލު ތަސްވީރުވެގެންދާނެ ގޮތް ބަޔާން ކުރާނެ އިންތިހާބެއް ކަމަށް ބައިޑަން ވަނީ ވިދާޅުވެފައެވެ.
ނޮވެމްބަރު މަހުގެ އިންތިހާބުގައި ބައިޑަންއާއެކު ރަނިންގް މޭޓެއްގެ ގޮތުގައި ނިކުންނަވަނީ ސެނެޓާ ކަމަލާ ހެރިސްއެވެ.
ބައިޑަންގެ ތަގުރީރާއެކު، 4 ދުވަހަށް ދެމިގެންދިޔަ ޑިމޮކްރަޓިކް ކޮންވެންޝަންގެ ނިމުމާ ހިސާބަށް ވަނީ އާދެވިފައެވެ.
ވެރިކަން ކުރާ ރިޕަބްލިކަންސްގެ ފަރާތުން އިންތިހާބަށް ނިކުންނަވާ ޓްރަމްޕް، ރަސްމީކޮށް ޓިކެޓް ގަބޫލުކުރައްވާނީ ވައިޓްހައުސްގައި ކުރިއަށްދާ އިވެންޓެއްގައެވެ. މި އިވެންޓް ޝެޑިއުލްކޮށްފައިވަނީ އަންނަ ހަފުތާއަށް ކަމަށް ޚަބަރު ލިބެއެވެ.
