ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަމާ ގުޅިގެން އިސްރާއީލުގެ ސަރުކާރުން އެކަށީގެންވާ ގޮތެއްގައި ފިޔަވަޅުތަކެއް ނޭޅި ކަންކަން ބޮއްސުންލައިގެން ދިއުމުގެ ސަބަބުން ކުރިމަތިވެފައިވާ އިގުތިސޯދީ ތަކުލީފުތަކާ ހެދި، ސަރުކާރާ ދެކޮޅަށް، އިސްރާއީލުގެ އެތައް ހާސް ރައްޔިތުންނެއް މަގުތަކަށް ނިކުމެ މުޒާހަރާ ކޮށްފިއެވެ.
ބައިނަލްއަގުވާމީ މީޑިއާއިން ލިބެމުންދާ މަންޒަރުތަކަށް ބަލާއިރު ރާބިން ސްކޮއާ މައިދާނުގައި ގިނައިން ހަރަކާތްތެރިވެފައިވަނީ ޒުވާނުންނެވެ. މާސްކު އަޅައިގެން ތިބި ކަމުގައި ވީ ނަމަވެސް، ޖިސްމާނީ ގައިދުރުކުރުމަށް އިހުތިރާމް ކުރާތީއެއް ނުފެނެއެވެ.
މި މުޒާހަރާ އިންތިޒާމު ކޮށްފައިވަނީ ކުދި ވިޔަފާރިތައް ހިންގާ ފަރާތްތަކާ، އަމިއްލަ މަސައްކަތުން އާމްދަނީ ހޯދާ ފަރާތްތަކުގެ އިތުރުން އެކި ކަހަލަ ދާއިރާތަކުގައި ހުށަހެޅުންތައް ހުށަޅައިދެމުން އައި ފަންނާނުންނެވެ.
މުޒާހަރާގެ ބައިވެރިން ބުނަމުން ދިޔައީ ސަރުކާރުން ދޭންޖެހޭ އެހީގެ ފައިސާ ލިބުން، އިންތިހާއަށް ލަސްވެފައި ވާ ކަމަށެވެ.
މުޒާހަރާގެ ބައިވެރިންގެ އެންމެ ބޮޑު ކަންބޮޑުވުމަކީ އިގުތިސޯދީ ތަކުލީފުތަކެއް ކަމުގައި ވާއިރު، އެމީހުންގެ ހިތްތަކުގައި ރުޅިވެރިކަން އުފެދިފައިވަނީ އާންމު ދިރިއުޅުން ގެއްލިފައިވާތީ ކަމަށް ޚަބަރު ލިބެއެވެ. މުޒާހަރާގެ ބައިވެރިން ވަނީ، ސަރުކާރުގެ ސްކީމްތަކުން އެމީހުންނަށް ލިބެންޖެހޭ ފައިސާ އަދިވެސް އަތަށް ލިބިފައި ނުވާ ކަމަށް ދައުވާކޮށްފައެވެ.
މަހު މުސާރަ ލިބެމުންދިޔަ މުވައްޒަފުންނަށް، ވަޒީފާ ނެތް މީހުންނަށް ދޭ އިނާޔަތްތަކާ ބެހޭ ސްކީމުން ފައިސާ ލިބެއެވެ. ނަމަވެސް އަމިއްލަ މަސައްކަތުން އާމްދަނީ ހޯދާ ފަރާތްތަކަށް އެހީގެ ގޮތުގައި ދޭނެ ކަމަށް އިސްރާއީލުގެ ސަރުކާރުން ވައުދުވެފައިވާ ފައިސާ އަދިވެސް ލިބިފައި ނުވާކަމަށް ޚަބަރު ލިބެއެވެ.
"އަހަރެންގެ ދަށުން 40 މުވައްޒަފުން މަސައްކަތް ކުރޭ. އާމްދަނީއެއް ނުލިބޭ. ފައިސާއެއް ނެތް. ހަމަޖެހުމަކަށް އަންނަންދެން ސަރުކާރުން އެބަޖެހޭ ފައިސާ ދޭން. މާޗް މަހުގެ މެދަކާ ހިސާބުން ފެށިގެން ގޮސް އޭޕްރިލް، މެއި، ޖޫން އަދި ޖުލައިވެސް މިދަނީ މަސައްކަތެއް ނެތި. އޯގަސްޓް މަސް ފެންނަނީ ވަރަށް ބިރުވެރިކޮށް" ސައުންޑް އެންޑް ލައިޓް ކުންފުންޏެއްގެ ނައިބު ރައީސް ކަމުގެ މަގާމުގައި ހުރި މައިކަލް ގައިސްޓް-ކާސިފް ބުންޏެވެ.
އިސްރާއީލުގެ ހުދުމުޚުތާރު ޔަހޫދީ ލީޑަރު ބެންޖަމީން ނަތަންޔާހޫ ވަނީ ހުކުރު ދުވަހުގެ ވަގުތެއްގައި އެކްޓިވިސްޓުންނާ ބައްދަލުކުރިކަމަށްވެސް ޚަބަރު ލިބެއެވެ.
ކޮވިޑް-19 ކޮންޓްރޯލް ކުރުމަށް އިސްރާއީލުގައި ލޮކްޑައުންގެ ހަރުކަށި އަމުރުތަކެއް ތަންފީޒު ކުރަން ފެށި މާޗް މަހުގެ މެދަކާ ހިސާބުގައެވެ. އެއަށްފަހު، މެއި މަހުގެ ފަހު ކޮޅުން ފެށިގެން ލުއިތަކެއް ދޭން ފެށިއެވެ. ނަމަވެސް އިސްރާއީލުގައި ވަޒީފާ ނެތް މީހުންގެ އަދަދު މިހާރު ވަނީ 21 ޕަސެންޓް އިތުރުވެފައެވެ.
މިވަގުތަކީ އިސްރާއީލުގައި ކޮވިޑް-19ގެ ބަލިމަޑުކަން އިންތިހާއަށް ބޮޑުވަމުން އަންނަ ވަގުތެއްކަން ފާހަގަކުރަންޖެހެއެވެ. ހުކުރު ދުވަހު އެކަނިވެސް އިސްރައީލުން 1500 އެއްހާ ކޭސް ރިޕޯޓްކުރިއެވެ. ޖޯންސް ހޮޕްކިންސް ޔުނިވަސިޓީގެ ރެކޯޑްތަކަށް ބަލާއިރު މި ބަލީގައި އިސްރާއީލުން 354 މީހެއްގެ ފުރާނަ ވަނީ ގެއްލިފައެވެ.
