މީހުން: އަބްދުއްނާސިރުގެ ދުލުން 3 ނޮވެމްބަރު

އަބްދުއްނާސިރް ޔޫސުފަކީ، އޭނާގެ އުމުރުގެ 32 އަހަރު، ދިވެހިރާއްޖޭގެ ދިފާއީ ބާރުތަކަށް ހިދުމަތް ކޮށްދިނުމުގައި ދެމިހުރި ގައުމު ފަހުރުވެރިވާފަދަ ފަރާތެކެވެ. މީގެ 32 އަހަރު ކުރިން ފޯރި ކާތިބެއްގެ ގޮތުގައި ސިފައިންގޭގެ ވަޒީފާއަށް ނާސިރު ވަންއިރު، އޭގެ ގާތްގަނޑަކަށް 8 މަސްފަހުން އޭނާ ކުރިމަތިލާން ޖެހޭނީ ކިހާވަރެއްގެ ކަމަކާކަމެއް އިހުސާސެއް ނުކުރެވެއެވެ.

ނާސިރަކީ، 1988، ނޮވެމްބަރު 3 ވަނަ ދުވަހު ރާއްޖެއަށް ދިން އުދުވާނީ ހަމަލާގައި ޒަހަމްވި ސިފައިންގެ މީހުންގެ ތެރެއިން އެކެކެވެ. ފޯރި ކާތިބެއްގެ މަގާމުގައި ހުރެ މެ، ގައުމަށްޓަކައި ނާސިރު ވީ ގުރުބާނީއެކެވެ. އުދުވާނީ ހަމަލާގައި ލިބުނު ޒަހަމްތަކަށް ބޭސް ކުރުމުގައި ހަޔާތުގެ އެތައް އަހަރުތަކެއް އޭނާ ހޭދަކޮށްފައި ވީ ނަމަވެސް އެ ޒަހަމްތަކަށް އަދި އަދަށްވެސް ހުރީ "ރޯ" ޒަހަމްތަކެއްގެ ގޮތުގައެވެ.

ނާސިރުގެ ދުލުން ނޮވެމްބަރު 3ގެ ހާދިސާ:

ނާސިރު ބުނީ، 1988 ވަނަ އަހަރު ނޮވެމްބަރު 3 ވަނަ ދުވަހު ރާއްޖެއަށް ދިން ހަމަލާއާއެކު އޭނާއަށް ވެސް ލިބުނީ ސިހުން ކަމަށެވެ. ބަޑި ޖަހާ އަޑު އިވެން ފެށީމާ ކުއްލިއަކަށް ލިބުނު ސިހުމާއެކު ސިފައިންގެއަށް އަމާޒުކުރަމުން ދިޔަ ވަޒަންތައް އޭނާ ސިފަ ކުރީ އަލިފާން ފަދައިންނެވެ.

ނާސިރު މަސައްކަތް ކުރަން އިންނަ މޭޒަކީ، ޝަހީދު ހުސެއިން އާދަމް ޑިއުޓީއަށް ހުރި ޕޯސްޓުގެ ފުރަގަހުން އެންމެ ފާރެއްގެ ހުރަހެއްގައި ހުންނަ މޭޒެކެވެ. މޭޒު ހުންނަ ދިމާލަށް ފެންލައިޓެއް ހުރެއެވެ. އުދުވާނީ ހަމަލާ ހިނގައި ދިޔަ ގޮތް ސިފަ ކޮށްދެމުން ނާސިރު ބުނީ، ހަމަލާ ދޭން ފެށިތާ މާ ގިނައިރެއް ނުވެ، ފާރުގައި ހުންނަ ފެންލައިޓު ތަޅައިގެން ގޮސް ބިއްލޫރިތައް މުޅިތަނަށް ފައިބަން ފެށި ކަމަށެވެ. އަދި އެވަގުތު ސަލާމަތް ހޯދުމަށް މޭޒު ދަށަށް ދެމިގަތް ކަމަށާއި ޝަހީދު ހުސެއިން އާދަމް، އޭނާގެ އެންމެ ފަހު ނޭވާ ދޫކޮށްލުމާ ހަމައަށްވެސް އެހީތެރިކަން ފޯރުކޮށްދެވޭތޯ ބަަލަމުން ގެންދިޔަ ކަމަށެވެ. ޝަހީދު ހުސައިން އާދަމްގެ ހަނދާން އާކޮށްދެމުން ނާސިބު ބުނީ މިހެންނެވެ.

އެކި ފަރާތްފަރާތުން ދުޝްމަނުންގެ ހަމަލާ ލިބެމުން ދިޔަ އިރު، އެ ހަމަލާތަކުން ސަލާމަތްވެ، އެކަމާ ކުރިމަތިލާނެ ގޮތެއް އަދި ހަތިޔާރެއްވެސް ލިބެން ނެތް އެ ހިތްދަތި ވަގުތު ނާސިރު ހިއްސާ ކުރެއްވީ އަސަރާ އެކުގައެވެ.

ހުއްޓުމެއްނެތި ސިފައިންގެއަށް ހަމަލާތައް ދެމުން ދަނިކޮށް، ނާސިރާއި އޭނާގެ އެސިސްޓެންޓް "ކަވަރު ނަގައިގެން" ތިބި މޭޒު ކައިރީގައި އޮތް އެހީތެރިއާގެ ގަޔަށްވެސް ވަޒަނެއް އެރިއެވެ. އޭރު، ހެނދުނު 7:30 ވެ 8:00 ޖަހާފާނެ ކަމަށް އޭނާ ބުންޏެވެ. އޭނާ ފަޔަށް ވަޒަން އެރިއިރު، ފަސްޓްއެއިޑެއް ވެސް ދެވޭނެ ގޮތެއް ނެތުމުން، އޭނާގެ ފަޔަށް ނާސިރު ފަރުވާ ދިނީ، ޔުނިފޯމެއް އިރައިރައިގެންނެވެ. ސިފައިންގެއިން ދުޝްމަނުންނާ ކުރިމަތިލާން ބަޔަކަށް ނުކުމެވޭވަރުވީ އެތައް ސިފައިންނެއް ޒަހަމްވި ފަހުން ހެނދުނު، 9:30 އާއި 10:00 އާ ދެމެދު ކަމަށް އޭނާ ބުނެއެވެ. ދުޝްމަނުންނާ ކުރިމަތިލުމަށް ހަތިޔާރާއެކު 12 ސިފައިން ތިބި ކަމަށާއި އެމީހުން ތިބީ، ސިފައިންގޭގައި ހޮސްޕިޓަލަށް މީހުން އުފުލަން ގެންގުޅޭ ވޭނެއްގައި ކަމަށް އޭނާ ކިޔައިދިނެވެ.

ނަމަވެސް ގޭޓު ހުޅުވުމަށް ކުރި މަސައްކަތް ވީ ނާކާމިޔާބެވެ. ވަޒަން އެރުމުގެ ސަބަބުން، ގޭޓުގެ ލޮކްތައް ތާށިވެ އެތެރެ ގޭޓާއި ބޭރު ގޭޓުވެސް ހުޅުވޭ ގޮތް ނުވީއެވެ. އެހިސާބުން، ގޭޓު ހުޅުވުމަށް އިތުރު ޕްލޭނެއް އެކުލަވާލައި، ގޭޓު ހުޅުވުމަށް ޖެއްސީ ޓްރެކްޓަރެކެވެ. ނަމަވެސް ޓްރެކްޓަރުވެސް ތާށި ވީއެވެ. އެކަން ފެއިލްވުމުން ދެން މަސައްކަތް ކުރީ ދަނގަޑު ހޮޅިއަކުން މަތާލައިގެން ގޭޓު ހުޅުވުމަށް ކަމަށް އޭނާ ބުންޏެވެ. ދުޝްމަނުންގެ ހަމަލާ ނާސިރު ގަޔަށް އެރީ އިތުރު ގޭޓު ހުޅުވުމުގެ މަސައްކަތް ކުރަން އުޅެނިކޮށެވެ. ހަމަލާ އެރީ، ތާށިވެފައި ހުރި ދަގަނޑުތަކުގެ ވަރަށް ބޮޑުބައި ނެއްޓިފައި ހުއްޓައެވެ.

ހަމަލާ އެރުމާއެކު، އަތުގެ ދެފަރާތުން ލޭފައިބަން ފެށީ ހުއްޓުމެއް ނެތިއެވެ. ނަމަވެސް ފައިބާ ލެއަކަށް ނުބަލާ، އަތުގަައި އޮޅާލާނެ އެއްޗެއް ލިބެތޯ ބެލި އިރު ނެތުމުން ޒަހަމް ވެފައިވާ އަތުގައި އޮޅީ ޔުނިފޯމް ފޮތިގަނޑެއް ކަމަށް ނާސިރު ކިޔައިދިނެވެ. އަދި ލޭ މަނާ ވޭތޯ، ވަރަށް ބާރަށް ނާޑުވާ ފަށެއް ވެސް އައްސާ ބާރުކުރިކަމަށްވެސް ބުންޏެވެ.

އަދި އަދަށްވެސް ނާސިރުގެ ޒަހަމަށް ފަރުވާއެއް ލިބިފައި ނުވާއިރު، އޭނާ ވަނީ ސެންޓްރަލް ހޮސްޕިޓަލުގައި 18 ދުވަސް ވަންދެން އޮތުމަށް ފަހު އިންޑިއާގެ ޓްރިވެންޑްރަމަށްވެސް ގޮސް ބޭސް ކޮށްފައެވެ. ނަމަވެސް ޑޮކްޓަރުންގެ ފަރާތުން ލިބުނީ އުއްމީދީ ޖަވާބެއް ނޫނެވެ. އަތް ބުރިނުކޮށްލާ ސަލާމަތްވާނެ ކަމުގެ އެއްވެސް ގެރެންޓީއެއް ޑޮކްޓަރުންގެ ފަރާތުން ނުލިބުނެވެ. އަތަށް ފަރުވާ ކުރުމަށް ހަކީމީ ބޭހާއި، ޑޮކްޓަރީ ބޭހާ އެއްކޮށްގެން ކުރި މަސައްކަތުން ވެސް އަދިވެސް އަތަށް ފުރިހަމަ ޝިފާ ލިބޭއެއް ނުލިބެއެވެ.