493 މައްސަލައެއްގައި ހިމެނޭ ގިނަ އަދަދެއްގެ ބަނގުރާ ދ.ކުޑަހުވަދޫ ޕޮލިސް ސްޓޭޝަނުން ނައްތާލައިފއެވެ.
ފުލުހުން ބުނީ އިއްޔެ ނައްތަލާފައި ވަނީ މިދިޔަ އަހަރުގެ ޖޫންމަހުގެ 19 ވަނަ ދުވަހުން ފެށިގެން މިދިޔަ މަހުގެ 25 ވަނަ ދުވަހާ ހަމަޔަަށް ހުށައަޅާފައިވާ މައްސަލަތަކާ ގުޅުން ހުރި ބަނގުރާކަމަށެވެ.
އެގޮތުން ނައްތާލާފައިވާ ބަނގުރަލުގެ ތެރޭގައި 769 ބަނގުރާ ފުޅިއާއި 694 ދަޅުގައި ހުރި ބަނގުރާ ހިމެނޭ ކަމަށް ފުލުހުން ބުނެއެވެ.
ބަނގުރާ ނައްތައިލުން ކުރިއަށް ގެންގޮސްފައި ވަނީ "ފުލުހުންގެ ބެލުމުގެ ދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާއި ގުޅިގެން ހިފެހެއްޓޭ ތަކެތި ނައްތައިލުމުގައި އަމަލުކުރާނެ ގޮތުގެ ގަވާއިދު" ގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުން ކަމަށްވެސް ފުލުހުން ބުނެއެވެ.
ފުލުހުންގެ ބެލުމުގެ ދަށަށް ގެންދެވޭ މަސްތުވާތަކެއްޗާއި، ބަނގުރާ ފަދަ ތަކެތީގެ ތެރެއިން ޝަރީއަތަށް ކޮންމެހެން ބޭނުންވާ ތަކެތި ފިޔަވައި އެހެން ހުރިހާ އެއްޗެއް ފުލުހުން ދަނީ އެކި ދުވަސް މަތިން ނައްތާލަމުންނެވެ.
