މަނީ ލޯންޑާ ކުރުމުގެ ތުހުމަތުގައި ފަސް އަހަރުގެ ޖަލު ހުކުމެއް ތަންފީޒު ކުރަމުންދާ ކުރީގެ ރައީސް އަބްދުﷲ ޔާމީން ޑޮކްޓަރަށް ދެއްކުމަށް މާލެ ގެނެސްފިއެވެ.
"ދަ ޕްރެސް" އަށް އެނގިފައިވާ ގޮތުގައި ރައީސް ޔާމީން މާލެ ގެނައީ ހިތުގެ ޑޮކްޓަރަކަށް ދެއްކުމަށް އައިޖީއެމްއެޗަށެވެ.
ރައީސް ޔާމީނަކީ "ކާޑިއެކް އެނަލިޔާ" އަށް ބޭސްފަރުވާ ކުރަމުންދާ ބޭފުޅެއް ކަމަށާއި، މައިބަދާއިގެ މައްސަލައެއް ހުރުމުގެ އިތުރުން ނަފްސާނީ އަދި ޖިސްމާނީ ގެއްލުންތަކެއް ވެފައިވާ ބޭފުޅެކެވެ. މިކަން މަނިކަފާނު ހާމަކުރައްވާފައި ވަނީ މިދިޔަ މަހުގެ 28 ވަނަ ދުވަހު ބޭއްވި އަޑުއެހުމުގައެވެ.
ސިއްހީ މައްސަލަތައް ދިމާވެފައި ވާއިރު، އެމަނިކުފާނު ވިދާޅުވެފައި ވަނީ ބޭސް ކުރުމަށް ރާއްޖެއިން ބޭރަށް ވަޑައިގަތުމަށާއި ސްޓްރެސްފުލް މާހައުލުތަކާ ދުރުގައި ހުންނެވުމަށާއި އަދި ސިއްހީ އެހީތެރިކަން ލިބިވަޑައިގަންނަވާ ތަނެއްގައި ހުންނެވުމަށް ވެސް ޑޮކްޓަރު ލަފާ ދެއްވާފައިވާ ކަމަށެވެ.
ރައީސް ޔާމީނުގެ ވަކީލު ޑރ. މުހައްމަދު ޖަމީލު އަހުމަދު ވިދާޅުވެފައި ވަނީ، ޔާމީން ހުކުމް ތަންފީޒު ކުރަމުން ގެންދަވާ ގޮޅިއަކީ އިންސާނުން ބައިތިއްބަން އެކަށީގެންވާ ގޮޅިއެއް ނޫންކަމަށާއި އެމަނިކުފާނު ގެކޮޅުގައި ބަހައްޓައިގެން ޝަރީއަތުގެ އިސްތިއުނާފުގެ މަރުހަލާ ނިމޭނެ ގޮތަށް ކުރިއަށް ގެންދިއުމަށް އެދިވަޑައިގަންނަވާ ކަމަށެވެ. ހަަމައެއާއެކު ސިޔާސީ ބައެއް ބޭފުޅުން ގޭގައި ބައިތިއްބާފައި އެބަ ހުރި ކަމަށް ޖަމީލު އިޝާރާތް ކުރެއްވިއެވެ.
ރައީސް ޔާމީންގެ މައްޗަށް ކޮށްފައިވާ މަނީ ލޯންޑަރިންގެ ހުކުމް ތަންފީޒު ކުރުން ލަސް ކުރެވެން ނެތް ކަމަށާއި، އަދި ބެއިލް ދެވެން ނެތް ކަމަށް ހައިކޯޓުން ނިންމައިފައި ވަނީ މިމަހު ހަ ވަނަ ދުވަހެވެ.
ރައީސް ޔާމީނަށް މަނީ ލޯންޑާކުރި ކުށް ސާބިތުވެ ކްރިމިނަލް ކޯޓުން 5 ފަނޑިޔާރުންގެ ބެންޗަކުން 5 އަހަރުގެ ޖަލު ހުކުމެއް ވަނީ ކޮށްފައެވެ. އަދި 5 މިލިއަން ޑޮލަރުން ޖޫރިމަނާކޮށް 6 މަސް ދުވަހުގެ މުއްދަތެއްގެ ތެރޭގައި އެފައިސާ ދެއްކުމަށްވެސް ވަނީ ހުކުމް ކޮށްފައެވެ.
