ވެލާނާ އިންޓަނޭޝަނަލް އެއާޕޯޓްގެ އާ ސީޕްލޭން ޓާމިނަލް ޓީއެމްއޭއަށް އެކުންފުނިން މިހާރުވެސް ބޭނުންކުރަމުންދާ ވަރުގެ ބޮޑު ޖާގައެއް ދިނުމަށް ސަރުކާރުން ނިންމި ނިންމުން މާލިއްޔަތު ކޮމިޓީއަށް ހުށަހަޅައިގެން ބަލާނެކަމަށް ދާންދޫ ދާއިރާގެ މެންބަރު ޔައުގޫބު އަބްދުﷲ ވިދާޅުވެއްޖެއެވެ.
ފިނޭންސް މިނިސްޓްރީން އިއްޔެ ބުނީ ސީޕްލޭން ޓާމިނަލް އިން، ޓީއެމްއޭއަށް ކުރިޔަށް އޮތް ދެ އަހަރަށް މިހާރުވެސް އެކުންފުނިން އެއާޕޯޓުގައި ހިންގާ ސީޕްލޭން ޓާމިނަލާ އެއްވަރުގެ ޖާގައެއް ދޭން ނިންމާފައިވާ ކަމަށާއި އަދި އެ ޖާގަ ދޫކޮށްފައިވަނީ މިހާރުގެ ޓީއެމްއޭގެ ސީޕްލޭން ޓާމިނަލް ދޫކޮށްފައިވާ އަގަށް ކަމަށެވެ. ޓީއެމްއޭއިން މިހާރު އެއާޕޯޓުގައި ހިންގާ ސީޕްލޭން ޓާމިނަލަކީ ގާތްގަނޑަކަށް 5300 އަކަފޫޓުގެ ޖާގައިގެ ތަނެކެވެ. އަލަށް ވެލާނާ އިންޓަނޭޝަނަލް އެއާޕޯޓުގައި ތަރައްގީކުރާ ސީޕްލޭން ޓާމިނަލަކީ 16،000 އަކަފޫޓު ގެ ބޮޑު ބިމެކެވެ. ސަރުކާރުން ޓީއެމްއޭއަށް އައު ޓާމިނަލުން ޖާގަ ދިނުމަށް ނިންމާފައިވަނީ އަކަ މީޓަރެއް 10.35 ޑޮލަރަށެވެ.
މިކަމާއި ގުޅިގެން ޔައުގޫބު ކުރެއްވި ޓްވީޓެއްގައި ވިދާޅުވީ ޓީއެމްއޭއަށް ޖާގަ ދިނުމުގައި ކަން ހިނގާދިޔަ ގޮތް މި ފެށޭ ހަފްތާގައި މާލިއްޔަތު ކޮމިޓީއަށް ހުށަހަޅައިގެން ބަލަމުންދާނެކަމަށެވެ. މިކަމާއި ގުޅިގެން އިދިކޮޅު ފަރާތްތަކުން ވެސް އަންނަނީ ވަރަށް ބޮޑަށް ފާޑު ކިޔަމުންނެވެ.
އެގޮތުން މާވަށު ދާއިރާގެ މެންބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވީ އާ ސީޕްލޭން ޓާމިނަލަކީ ފައިދާވާނެ ގޮތަކަށް ކޮށްފައިވާ އިންވެސްޓްމެންޓެއް ކަމަށެވެ. އަދި އެއިންވެސްޓްމެންޓްތަކާ މެދު މި ސަރުކާރަށް އަމަލު ކުރާނެ ގޮތެއް ނޭނގުނު ކަމަށް ސައީދު ވިދާޅުވިއެވެ.
މި މައްސަލައާއި ގުޅިގެން ވިލިމާލެ ދާއިރާގެ މެންބަރު އަޙްމަދު އުޝާމް ވިދާޅުވީ ދައުލަތަށް ފައިދާއެއް ލިބެން އޮތް އެއްވެސް ކަމެއްގެ ފައިދާ ދައުލަތަށް ނުލިބޭގޮތަށް އެ ފައިދާއަށް އެއްވެސް އުނިކަމެއް ލިބޭގޮތަށް އަމަލުކުރުމަކީ ގާނޫނީ ކުށެއްކަމަށާއި، އެއީ ކޮރަޕްޝަންގެ އަމަލެއްކަމަށެވެ.
ފިނޭންސް މިނިސްޓްރީން ބުނީ ދެ އަހަރުގެ މުއްދަތަކަށްފަހު ސީ ޕްލޭން ޓާމިނަލްގެ ފުލް އޮޕަރޭޝަން އެމްއޭސީއެލްއިން ނަގާނެ ކަމަށެވެ. އަދި އެއަށްފަހު އެތަނުން ނަގަމުންދާ ކުލިތަކަށްވެސް ބަދަލު ގެންނާނެކަމަށް ފިނޭންސްއިން ބުނެއެވެ.
