އައްޑޫސިޓީގެ ޕޯޓު "ބޮޑު ބާޒާރަކަށް" ބަދަލުކުރުމާ ގުޅޭގޮތުން އިކޮނޮމިކް މިނިސްޓަރު ފައްޔާޒު އިސްމާއީލްއާއި އައްޑޫ ޑިވެލޮޕްމަންޓް ކޮމެޓީ (އޭޑީސީ)އިން ބައްދަލުކޮށްފިއެވެ.
އައްޑޫ ޑިވެލޮޕްމަންޓް ކޮމެޓީ (އޭޑީސީ)ގެ ނާއިބު ރައީސް އަދި ސައިރިކްސް ކޮލެޖުގެ ޗެއާމަން އަހުމަދު ޝަރީފު ވިދާޅުވީ އިކޮނޮމިކް މިނިސްޓަރު ފައްޔާޒާ އެކު މިއަދު ބޭއްވުނު ބައްދަލުވުމުގައި އައްޑޫ ޕޯޓުގެ ސަރަހައްދު، ވިޔަފާރީގެ ބޮޑު ބާޒާރަކަށް ބަދަލު ކުރެވޭނެ ގޮތަކަށް މަޝްވަރާ ކުރެވުނު ކަމަށެވެ. އަދި ދެކުނުގެ އެތެރޭގެ ސީ ޓްރާންސްޕޯޓު ސިސްޓަމް ގާއިމް ކުރުމަށް ވެސް މިނިސްޓަރު ފައްޔާޒުއާ މަޝްވަރާ ކުރެވުނު ކަމަށެވެ.
މީގެއިތުރުން އައްޑޫ އިންޓަނޭޝަނަލް އެއާޕޯޓުގެ ތަރައްގީއާ ގުޅޭ ގޮތުންވެސް މަޝްވަރާ ކުރެވުނު ކަމަށް އޭޑީސީގެ ނާއިބު ރައީސް ޝަރީފު ވިދާޅުވިއެވެ. އަދި އައްޑޫ ސިޓީއަށް ޝެޑިއުލް ދަތުރުތައް ކުރަމުން އަންނަ ސްރީލަންކަން އެއާލައިންސްގެ ދަތުރުތައް އައްޑޫސިޓީން ހުވަދޫ އަތޮޅަށް ކުރެވޭނެ އިންތިޒާމުތައް ހަމަޖެހޭނެ ގޮތްތަކާ ގުޅޭ ގޮތުންވެސް މަޝްވަރާ ކުރެވުނު ކަމަށް އޭނާ ވިދާޅުވިއެވެ.
އޭޑީސީއަކީ 2012 އިން ފެށިގެން އައްޑޫގެ ތަރައްގީއަށް މަސައްކަތް ކުރަމުން ދާ ޖަމިއްޔާއެކެވެ. އެ ޖަމިއްޔާއިން އަންނަނީ އައްޑޫގެ ތަރައްގީއާ ގުޅޭ ގޮތުން ގިނަ މަސައްކަތްތަކެއް ކުރަމުންނެވެ.
