ދެ ރަށެއްގެ މެޖިސްޓްރޭޓު ކޯޓުތަކަށް ބޭފުޅުން އައްޔަންކޮށްފިއެވެ.
ޖުޑީޝަލް ސާވިސް ކޮމިޝަން (ޖޭއެސްސީން) ކޮށްފައިވާ އިއުލާނެއްގައި ބުނީ މެޖިސްޓްރޭޓުން ހޯދުމަށް ކުރި އިއުލާނާ ގުޅިގެން 16 ފަރާތެއް ކުރިމަތިލާފައިވާ ކަމަށެވެ. އަދި އެ ފަރާތްތަކުގެ ތެރެއިން ޝޯޓުލިސްޓު ކުރުމަށްފަހު ދެ ރަށަކަށް މެޖިސްޓްރޭޓުން އައްޔަން ކުރުމަށް ނިންމާފައިވާ ކަމަށް ޖޭއެސްސީން ބުންޏެވެ.
އެގޮތުން ޖޭއެސްސީން ބުނީ ތ. ކިނިބިދޫ، ނަސްރުއްސަބާ، އަލްއުސްތާޒު އަބްދުﷲ ހުސައިން ތ. ހިރިލަންދޫ މެޖިސްޓްރޭޓު ކޯޓުގެ އިސް މެޖިސްޓްރޭޓުގެ މަގާމަށް އައްޔަން ކޮށްފައިވާ ކަމަށެވެ. ކ. ގުރައިދޫ މެޖިސްޓްރޭޓު ކޯޓުގެ އިސް މެޖިސްޓްރޭޓުގެ މަގާމަށް ލ. މާވަށް، ނަލަހަމަ، އަލްއުސްތާޒު ފަތުހުﷲ ޖަމީލް މޫސާ އައްޔަން ކުރުމަށް ނިންމާފައިވާ ކަމަށެވެ.
ޖޭއެސްސީން މީގެކުރިން އިއުލާނުކުރީ 14 މެޖިސްޓްރޭޓު ކޯޓަކަށް މެޖިސްޓްރޭޓުން ހޯދުމަށެވެ. އަދި އެކަމަށް އެކަށީގެންވާ ތަރުހީބެއް ލިބިގެން ނުދާތީ ޖޭއެސްސީން ވަނީ އެ އިއުލާނަށް މުއްދަތު އިތުރުކޮށްފައެވެ.
ޖޭއެސްސީން ބުނީ އިސްމެޖިސްޓްރޭޓުން މަހަކު މުސާރައިގެ ގޮތުގައި 21،000 ރުފިޔާ އަދި މެޖިސްޓްރޭޓުން 18،500 ރުފިޔާ ލިބޭނެ ކަމަށެވެ. އަދި ލިވިން އެލަވަންސްގެ ގޮތުގައި 4000 ރުފިޔާއާ، ރިސްކް އެލަވަންސްގެ ގޮތުގައި 6000 ރުފިޔާ ލިބޭނެ ކަމަށެވެ.
