މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ސެނަހިޔަ ހޮސްޕިޓަލްގެ ނަން "ސެނަހިޔަ މިލިޓަރީ ހޮސްޕިޓަލް" ގެ ނަމަށް ބަދަލުކޮށްފިއެވެ.
މިކަމަށްޓަކައި މިއަދު ހަވީރު ވަނީ ސެނަހިޔަ މިލިޓަރީ ހޮސްޕިޓަލް ކުރިމަތީ ހާއްސަ ރަސްމިއްޔާތެއް ބާއްވާފައެވެ. އެ ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލެވެ. އަދި އެރަސްމިއްޔާތުގައި އެމަނިކުފާނު ވަނީ އެމްއެންޑީއެފް މެޑިކަލް ކޯޕްސްގެ ދިދަ އިފްތިތާހު ކޮށްދެއްވާފައެވެ.
މީގެ އިތުރުން ޗީފް އޮފް ޑިފެންސް ފޯސް ވަނީ އެމްއެންޑީއެފް މެޑިކަލް ކޯޕްސްއިން ހިންގާ ކޯސްތަކާ ގުޅޭ "ކޮމްބެޓް މެޑިކް މެނުއަލް" ފޮތް ވެސް ނެރެދެއްވާފައެވެ. މި ރަސްމިއްޔާތުގައި އެމްއެންޑީއެފް މެޑިކަލް ކޯޕްސްގެ ފަރާތުން ވަނީ ޗީފް އޮފް ޑިފެންސް ފޯސްއަށް ހާއްސަ ކޮއިންއެއް އަރުވާފައެވެ. މި ކޮއިން، ޗީފް އޮފް ޑިފެންސް ފޯސްއަށް ހަވާލުކޮށްދެއްވީ މެޑިކަލް ކޯޕްސްގެ ކޮމާންޑިން އޮފިސަރު، ކާނަލް ޑރ ޢަލީ ޝާހިދު މުހައްމަދެވެ.
ސެނަހިޔަ މިލިޓަރީ ހޮސްޕިޓަލް ރަސްމީކޮށް ހޮސްޕިޓަލަކަށް ބަދަލު ކޮށްފައިވަނީ މިއަހަރުގެ މާޗު މަހުގެ ނުވަވަނަ ދުވަހުއެވެ.
