ހައްދުފަހަނައަޅާފައިވާ ޔަހޫދީ އިސްރާއީލުން އަނެއްކާވެސް ގައްޒާއަށް އުދުވާނީ ހަމަލާތައް ދޭން ފަށާ، ފަލަސްޠީނުގެ 10 މީހަކު ޝަހީދުކޮށްލައިފިއެވެ.
އިސްރާއީލުގެ އުދުވާންތަކުގެ ޝިކާރައަކަށްވި މީހުންގެ ތެރޭގައި އިސްލާމިކް ޖިހާދުގެ އިސް ކޮމާންޑަރު ބަހާ އަބޫ އަލް-އަތޯވެސް ހިމެނޭ ކަމަށް ޚަބަރު ލިބެއެވެ.
އިސްރާއީލުގެ އުދުވާންތަކާއެކު ގައްޒާއިންވެސް އިސްރާއީލަށް ހަމަލާދީފައިވާކަމަށް މީޑިއާ ރިޕޯޓްތައް ބުނެއެވެ. މިއާއިއެކު އިސްރާއީލާ ގައްޒާއާއި ދެމެދު އިތުރު ހަމަލާތަކެއް ބަދަލުކުރަން ފަށާފާނެ ކަމުގެ ބިރުވެރިކަން ވަނީ އިންތިހާއަށް އިތުރުވެފައެވެ.
އިސްރާއީލުންވަނީ ނޮވެމްބަރު 12 ވަނަ ދުވަހުން ފެށިގެން 48 ގަޑިއިރުގެ ނިޔަލަށް، ގައްޒާއާއި ކައިރި ހިސާބުތަކުގައި ސްޓޭޓް އޮފް އެމާޖެންސީ އިއުލާންކޮށްފައެވެ.
އުރުދުންއިންވަނީ އިސްރާއީލުން ގައްޒާއަށް އަމާޒުކޮށް އަލުން ދޭންފެށީ ހަމަލާތައް ކުށްވެރިކޮށްފައެވެ. މީގެ އިތުރުން މިފަދަ ހަމަލާތައް ހުއްޓާލުމަށް ޖަރުމަނުވިލާތުންވެސް ވަނީ ގޮވާލާފައެވެ. ކަންމިހެން އޮތްއިރު މިސްރުން ދަނީ އިސްރާއީލާ ގައްޒާއާއި ދެމެދު އުފެދިފައިވާ ނުތަނަވަސްކަން ކުޑަކުރުމަށް މަސައްކަތްތަކެއް ކުރަމުންނެވެ.
