އަރަބި ގަލްފް ކަނޑުގެ ސަރަހައްދުން ބައިނަލްއަގުވާމީ ބާޒާރަށް ތެޔޮ ސަޕްލައި ކުރަމުންދާ ރޫޓުގެ ސަލާމަތީ ކަންކަން ބެލެހެއްޓުމުގެ ގޮތުން އެމެރިކާގެ ކަނޑުގެ އަސްކަރިއްޔާ އިސްކޮށް އޮވެގެން އެކުލަވާލާފައިވާ ކޯލިޝަންގެ އޮޕަރޭޝަންތައް ރަސްމީކޮށް ބަހްރައިންގައި ފަށައިފިއެވެ.
ގަލްފް ކަނޑުގެ ސަރަހައްދުން ދަތުރުކުރާ ބޯޓުފަހަރަށް އަމާޒުކޮށް މިފަހަކަށް އައިސް ދޭ ހަމަލާތައް އިތުރުވެފައިވާއިރު އެމެރިކާއާއާއި އެމެރިކާއަށް އެއްބާރުލުން ދޭ ގައުމުތަކުން ބުނާ ގޮތުގައި، މި ހަމަލާތައް ދެނީ އީރާނުންނެވެ.
މިފަދަ ހަމަލާތަކުން ކަނޑުބޯޓުފަހަރު ސަލާމަތް ކުރުމަށް އެމެރިކާ އިސްވެ އޮވެ ބަހްރައިންގައި އިފްތިތާހުކުރި އަސްކަރީ ކޯލިޝަނު އެކުލަވާލުމުގެ މަސައްކަތް ކުރަން ފަށާފައި ވަނީ މިއަހަރުގެ ޖޫން މަހުގެ ތެރޭގައެވެ. މި ކޯލިޝަނަކީ ދުނިޔޭގެ ބާޒާރަށް ތެޔޮ ސަޕްލައި ކުރަމުންދާ ބޯޓުތަކުގެ ސަލާމަތްތެރިކަން ކަށަވަރު ކުރުމަށް ހާއްސަކޮށްގެން އެކުލަވާލި އަސްކަރީ ކޯލިޝަނެކެވެ.
މި ކޯލިޝަނުގައި ހިމެނެނީ އެމެރިކާއާއި ބަހްރައިންގެ ކަނޑުގެ އަސްކަރިއްޔާގެ އިތުރުން ސައުދީ އަރަބިއްޔާއާއި އެކުވެރި އަރަބި އިމާރާޓް (ޔޫއޭއީ)ގެ ކަނޑުގެ އަސްކަރިއްޔާގެ ގޮފިތަކެވެ.
އެމެރިކާއާއި އެމެރިކާއަށް އެއްބާރުލުންދޭ ގައުމުތަކުގެ ތުހުމަތުތަކަށް އިންކާރު ކުރަމުންދާ އީރާނުންވަނީ، ގަލްފް ކަނޑުގެ ސަރަހައްދުން ދަތުރުކުރާ ބޯޓުފަހަރުގެ ސަލާމަތްތެރިކަން ކަށަވަރުކުރާނެ ޕްލޭނެއް އަމިއްލައަށް އެކުލަވާލާފައެވެ.
