ޑިޕާޓުމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އަށް ގެނައި ބަދަލަކީ ކޯޓުތަކުގެ އިސް ފަނޑިޔާރުންގެ ހައިސިއްޔަތު ކުޑަކުރަން ގެނެސްފައިވާ ބަދަލެއް ނޫން ކަމަށް އެ ޑިޕާޓުމަންޓުން ބުނެފިއެވެ.
ޑީޖޭއޭއިން މިއަދު ނެރުނު ނޫސްބަޔާނެއްގައި ބުނީ ޖުޑީޝަލް ސާވިސް ކޮމިޝަން (ޖޭއެސްސީ)ގެ ގާނޫނަށް އިސްލާހު ގެނެވި ޑީޖޭއޭ އަލުން އެކުލަވާލެވުނު ހިސާބުން އެ ގާނޫނުން ޑިޕާޓްމަންޓަށް މަތިކޮށްފައިވާ މަސްއޫލިއްޔަތުތައް އޭގެ އެންމެ ފުރިހަމަ ގޮތުގައި އަދާކުރުމަށްޓަކައި ކުރަންޖެހޭ ކަންކަން އެ ޑިޕާޓްމަންޓުން ކުރަމުން ގެންދާ ކަމަށެވެ. ދިވެހިރާއްޖޭގެ އަދުލު އިންސާފު ގާއިމުކުރުމުގެ ބާރުގެ އާންމު އިދާރީ ކަންކަން ރާވައި ހިންގައި ބެލެހެއްޓުމަކީ ޖޭއެސްސީގެ ގާނޫނުން އެ ޑިޕާޓުމަންޓަށް މަތިކޮށްފައިވާ ޒިންމާއެއް ކަމަށް އެ ބަޔާނުގައި ޑީޖޭއޭއިން ބުނެފައިވެއެވެ. އެގޮތުން އެ ޑިޕާޓުމަންޓާއި ހަވާލުވެފައިވާ ޒިންމާތަކާއި މަސްއޫލިއްޔަތުތައް އެ ޑިޕާޓުމަންޓުން ވަނީ ހިއްސާ ކޮށްފައެވެ.
"މަގާމުގެ ކުރިއެރުން ދިނުމާއި، އިދާރީ ފިޔަވަޅު އެޅުމާއި، އިދާރީ މުވައްޒަފުންގެ ވަޒީފާއާބެހޭކަންކަން އެ ކޯޓެއްގެ ޗީފް އެޑްމިނިސްޓްރޭޓަރު ނުވަތަ އިދާރީ އެންމެ އިސް މުވައްޒަފުގެ މަޝްވަރާގެ މަތިން ހިންގައިބެލެހެއްޓުމާއި، އެކިއެކި ޖުޑީޝަލް ދާއިރާތަކުގައި މައްސަލަތައް ނުނިމި ލަސްވުމުގެ ސަބަބުން ނުވަތަ އެ ދާއިރާއެއްގައި މެޖިސްޓްރޭޓުން މަދުވުމުގެ ސަބަބުން މައްސަލަ ބެލުން ލަސްވަމުންދާނަމަ، ޖުޑީޝަލް ސާވިސް ކޮމިޝަނުން ކަނޑައަޅާ އުސޫލަކުން ރަށްރަށަށް ފޮނުވަންޖެހޭ ޝަރުއީ ވަފުދުތައް ފޮނުވުމުގެ އިދާރީ ކަންކަން ހަމަޖެއްސުމާއި، މިނޫނަސް ގާނޫނުއަސާސީއާއި އެހެން ގާނޫނުތަކުން ޙަވާލުކުރެވޭ އެންމެހައި ކަންކަން ކުރުމަކީ މި ޑިޕާޓްމަންޓުގެ މަސްއޫލިއްޔަތުގެތެރޭގައި ހިމެނޭ ކަންކަމެވެ،" ޑީޖޭއޭއިން ބުންޏެވެ.
ޑީޖޭއޭއިން ބުނީ ޝަރުއީ ދާއިރާގައި ހުރި މައްސަލަތައް ހައްލުކުރުމުގެ މަސައްކަތް ދައުލަތުން ކުރަމުންދާ ދަނޑިވަޅުގައި ގާނޫނުން މަތިކޮށްފައިވާ ޒިންމާތައް ތައައްސުބުން އެއްކިބާވެ، މުސްތަގިއްލުކަމާއި މިނިވަންކަމާއެކު އަދާކުރުމަށްޓަކައި އިދާރީގޮތުން ގެނަންޖެހޭ ބަދަލުތައް ގެނައުމުގެ މަސައްކަތް ކުރަމުން ގެންދާ ކަމަށެވެ.
އެގޮތުން، އަހަރުން އަހަރަށް އިތުރުވަމުންދާ ޝަރުއީ ކޭސްލޯޑް އިންފޮމޭޝަން ޓެކްނޮލޮޖީގެ ވަސީލަތްތައް ބޭނުންކޮށްގެން ހެޔޮގޮތުގައި މެނޭޖްކޮށް އަވަސްކަމާއި ހަލުވިކަމާއެކު ރައްޔިތުންނަށް އަދުލު އިންސާފު ފޯރުކޮށްދިނުމުގެ މަގުސަދުގައި، ކޯޓުތަކުގެ އިދާރީ ކަންކަންރާވައި ހިންގުމަށް ޓަކައި އިދާރީ އިސް މުވައްޒަފުންގެ ގޮތުގައި މުވައްޒަފުން ހަމަޖައްސައި ޝަރީއަތްތައް ހިންގުމުގައި ފަނޑިޔާރުންނަށް ބޭނުންވާނެ އެހީތެރިކަން ފޯރުކޮށްދިނުމުގެ މަސައްކަތް ކުރަމުން ގެންދާ ކަމަށް ޑީޖޭއޭގެ ބަޔާނުގައި ވަނީ ފާހަގަކޮށްފައެވެ.
"މިކަމަކީ، އެއްވެސް ހާލެއްގައި، ކޯޓު ހިންގުމާއި ހަވާލުވެ ހުންނަވާ އެންމެ އިސް ފަނޑިޔާރުގެ ހައިސިއްޔަތު ކުޑަކޮށް، އަދުލު އިންސާފު ފޯރުކޮށްދިނުމުގައި ފަނޑިޔާރުންގެ ދައުރު ކުޑަކުރުމުގެގޮތުން ކޮށްފައިވާ ކަމެއް ނޫންކަންފާހަގަކުރަމެވެ. މި ގެނެވުނު ބަދަލަކީ، ކޯޓުތަކުގެ އެފިޝިއެންސީ އިތުރުކޮށް ހަލުވިކުރުމަށްޓަކައި ގާނޫނުން އެކަށައަޅައިފައިވާ ތަރަހައިގެ ތެރޭގައި ގެނެވިފައިވާ ބަދަލެކެވެ،" ޑީޖޭއޭ އިން ބުންޏެވެ.
އެ ޑިޕާޓްމަންޓުގެ އަމާޒަކީ، ރައްޔިތުންނާއި ގާތުން ރައްޔިތުންނަށް ފަސޭހަވާނޭ ގޮތަށް ކޯޓުތަކުގެ ހިންގުން ބައްޓަންކުރުމަށްޓަކައި ކޯޓުތަކުގެ އިދާރީ ހިންގުން އެއްގޮތްކޮށް ހުރިހާ މަރުހަލާއެއްގެ ކޯޓުތަކުންވެސް ރައްޔިތުންނަށް ބޭނުންވާ ހިދުމަތްތައް ހަލުވިކަމާއި ފަސޭހަކަމާއެކު ލިބޭނޭ އިންތިޒާމް ހަމަޖެއްސުން ކަމަށެވެ.
ޑީޖޭއޭއިން މިފަދައިން ނޫސްބަޔާނެއް ނެރެފައި މިވަނީ ޖުޑީޝަލް ސާވިސް ކޮމިޝަނުގެ ގާނޫނަށް ގެނެވުނު އިސްލާހާއި އެކުގައި ޑީޖޭއޭ އެ ކޮމިޝަނުގެ ބެލުމުގެ ދަށަށް ގެންދެވުމުން އެކަމާއި އުއްތަމަ ފަނޑިޔާރު ކަންބޮޑުވުންފާޅު ކުރައްވަމުން ގެންދަވާ ދަނޑިވަޅެއްގައެވެ.
