ޖުމްހޫރީ ޕާޓީ (ޖޭޕީ)ން ސަރުކާރަށާއި ރައީސް އިބްރާހީމް މުހައްމަދު ސޯލިހަށް ފާޑު ކިޔާފައި ނުވާނެ ކަމަށް އެޕާޓީން ބުނެފިއެވެ.
އެޕާޓީން މިހެން ބުނެފައިވަނީ ރާއްޖެ ޓީވީގެ "ފަލަސުރުހީ" މިދިޔަ ބުރާސްފަތި ދުވަހު ވާހަކަދައްކަވަމުން އެމްޑީޕީގެ ޕާލިމަންޓްރީ ގްރޫޕުގެ ލީޑަރު އަލީ އާޒިމް ދެއްކެވި ވާހަކަފުޅަކާއި ގުޅިގެންނެވެ. އާޒިމް ވިދާޅުވީ ސަރުކާރުގައި އޮވެގެން ޖުމްހޫރީ ޕާޓީގެ ލީޑަރު ސަރުކާރަށް އަދި ސަރުކާރު ހިންގާ ޕާޓީ އަށް ވެސް ފާޑުވިދާޅުވެގެން ނުވާނެ ކަމަށެވެ. އޭނާ ވިދާޅުވީ ސަރުކާރުން ހިންގާ މައިޕާޓީއަކީ އެމްޑީޕީ ކަމަށެވެ. ކޯލިޝަނެއްގެ ގޮތުގައި އޮތްނަމަވެސް ސަރުކާރުން ހިންގާ މެޖޯރިޓީއަކީވެސް އެމްޑީޕީ ކަމަށް ވިދާޅުވެ އަލީ އާޒިމް ވިދާޅުވީ އެމްޑީޕީއަށް ފާޑުވިދާޅުވާ ނަމަ ޖުމްހޫރީ ޕާޓީގެ ލީޑަރު ވެސް އަދި ޖުމްހޫރީ ޕާޓީ ވެސް ކޯލިޝަނުން ނިކުމެގެން ވަޑައިގަންނަވަންވީ ކަމަށް އާޒިމް ވިދާޅުވިއެވެ.
އަލީ އާޒިމްގެ ވާހަކަތަކާ ގުޅިގެން ޖޭޕީން ނެރުނު ބަޔާނެއްގައި ބުނީ، އެ ޕާޓީން މިހާތަނަށް މި ސަރުކާރަށާއި ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހަށް އެއްވެސް މިންވަރަކަށް ފާޑުކިޔާފައި ނުވާނެ ކަމަށެވެ. އަލީ އާޒިމްގެ އެ ވާހަކަތައް ދޮގު ކޮށް ޖޭޕީން ބުނީ މަޖިލީހުގެ ރައީސް ނަޝީދު ކުރައްވާ ކަންކަމަށާއި ދައްކަވާ ވާހަކަތަކަށް ފާޑުކިޔަން ޖެހެނީ، އެކި އެކި ކަންކަމުގައި ދިވެހިންނާ ބީރައްޓިހި، ގައުމީ ދީނީ އެއްބައިވަންތަކަށް ގެއްލޭ މިންވަރަށް ވާހަކަފުޅުދައްކަވާތީ ކަމަށެވެ. އަދި ކޯލިޝަނުގައި ޖޭޕީ އޮތް ނަމަވެސް އިސްލާމް ދީނާއި ގައުމާއި ރައްޔިތުންނަށް ގެއްލުންވާނެ ކަމެއް ކުރާ ނަމަ އެކަމާ ދެކޮޅަށް ވާހަކަ ދައްކާނެ ކަން އެ ބަޔާނުގައި ވަނީ ބުނެފަ އެވެ.
ޖޭޕީން މިފަދައިން ބުނެފައިވާއިރު ދާދިފަހުން ވެސް ޖޭޕީން ބޭއްވި ހަފްލާއެއްގައި އެޕާޓީގެ ލީޑަރު ގާސިމް އިބްރާހީމް ވަނީ ރައީސުލްޖުމްހޫރިއްޔާއަށް ތައުރީފު ކުރައްވާ ވާހަކަފުޅުދައްކަވާފައެވެ. ހާއްސަކޮށް އެރޭގެ ޖަލްސާގައި ގާސިމް ވަނީ ސަރުކާރުން ތަރައްގީގެ މަޝްރޫއު ނުހިންގާ ކަމަށްބުނާ ފަރާތްތަކަށް ރައްދު ދެއްވާފައެވެ. އޭނާ ވިދާޅުވީ ނެތް އެއްޗަކުން ގައުމުގައި ތަރައްގީގެ މަޝްރޫއު ނުހިންގޭނެ ކަމަށެވެ. އެއީ ރައީސް އިބްރާހީމް މުހައްމަދު ސޯލިހު ކުރައްވާނެ ކަމެއް ނޫން ކަމަށް ގާސިމް ވިދާޅުވިއެވެ. ހަމަ އެ ވާހަކަފުޅުގައި ގާސިމް ވަނީ ރައީސް ސޯލިހު ސަރުކާރުގެ ސްޕީޑު ލަސް ކަމަށް ވިދާޅުވެ މިހާތަނަށް ވާހަކަދައްކަވާފައި ހުރީ ވެސް އެމްޑީޕީގެ މެންބަރުންނާއި އެމްޑީޕީގެ އިސް ފަރާތްތައް ކަމަށް ވިދާޅުވެ ފާޑު ވިދާޅުވެފައެވެ.
