މަރު ކޮމިޝަނުން ބަލަމުން ގެންދާ މައްސަލައަކާ ގުޅިގެން މީހަކު ހޯދަން އިއުލާނު ކޮށްފިއެވެ.
މަރު ކޮމިޝަނުން ބުނީ އެ ކޮމިޝަނުން ބަލަމުން ގެންދާ މައްސަލައަކާ ގުޅިގެން މ. ކުރިރުއްގެ އިރްފާން ރުޝްދީ ނަމަކަށް ކިޔާ މީހަކު ހޯދަން ބޭނުންވާ ކަމަށެވެ. އޭނާއަކީ އެ ކޮމިޝަނުން ބަލަމުން ގެންދާ މައްސަލައަކާ ގުޅިގެން ހޯދައި ނުފެނިފައިވާ މީހެއް ކަމަށްވެސް އެ ކޮމިޝަނުން ބުންޏެވެ.
އެނގިފައިވާ ގޮތުގައި އިރްފާން ހޯދަމުން ދަނީ 2016 ވަނަ އަހަރުގެ ޖޫން މަހުގެ ތެރޭގައި މަރާލި މ. ސަރުމާގޭ، ފާތިރު މުހައްމަދު އަލީގެ މަރުގެ މައްސަލައާ ގުޅިގެންނެވެ.
ފާތިރު މަރުވީ މަރާމާރީއެއްގައި ކ. ކާށިދޫ، ރަންފަރު، އަހްމަދު އިރުޝާން ހިލްމީގެ މަރާ ގުޅިގެން އެކަމުގެ ބަދަލު ހިފުމުގެ ގޮތުން މާރާމާރީ ހިންގާ ދިން ހަމަލާތަކެއްގަ އެވެ.
މަރު ކޮމިޝަނަކީ ރައީސް އިބްރާހީމް މުހައްމަދު ސޯލިހު ރާއްޖޭގެ ވެރިކަމާ ހަވާލުވެވަޑައިގެންނެވި ދުވަހު އުފެއްދި ކޮމިޝަނެކެވެ. އެ ކޮމިޝަނަކީ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް ރައީސް އުފެއްދެވި ކޮމިޝަނެކެވެ.
ރިޔާސީ ކޮމިޝަނަށް ލިބޭ ގާނޫނީ ބާރުގެ ތެރޭގައި ޖިނާއީ އިޖުރާއަތުގެ ގާނޫނުން ލިބިދޭ ބާރުތައް ރިޔާސީ ކޮމިޝަންތަކަށް ލިބުމާއި، މީހުން ހާޒިރު ކުރުމާއި ބަޔާން ނެގުމާއި ބަލާ ފާސް ކުރުމަށް ކަމާ ބެހޭ މުއައްސަސާތަކަށް އެނގުމުގެ ބާރު ވެސް ހިމެނެއެވެ.
