ޔޫތު މިނިސްޓްރީން ރާއްޖޭގެ ރަށްތަކުގައި މިހާރު އަޅަމުންދާ ދަނޑުތަކުގެ މަސައްކަތް އަންނަ އަހަރުގެ ފެބްރުއަރީ މަސް ތެރޭގައި ނިންމާލެވޭނެ ކަމަށް އުއްމީދު ކުރައްވާ ކަމަށް ޔޫތު މިނިސްޓަރު އަހުމަދު މަހްލޫފު ވިދާޅުވެއްޖެއެވެ.
ޔޫތު މިނިސްޓްރީގެ މަސައްކަތްތަކާ ގުޅިގެން މިއަދު ހެނދުނު ނޫސްވެރިންނާ ބައްދަލުކޮށް ވާހަކަދައްކަވަމުން ޔޫތު މިނިސްޓަރު ވިދާޅުވީ ބައެއް ދަނޑުތައް ހެދުމަށްޓަކައި މިހާރުވެސް އިއުލާނު ކުރެވިފައިވާ ކަމަށެވެ. އަދި މަސައްކަތްތައް ކުރިއަށްދާ ގިނަ އަދަދެއްގެ ދަނޑުތަކެއް ވެސް އެބަހުރިކަން ފާހަގަކުރައްވާ މަހްލޫފު ވިދާޅުވީ އަމާޒަކީ އަންނަ އަހަރުގެ ކުރީ ކޮޅު އެ ދަނޑުތަކުގެ މަސައްކަތް ނިންމާ ޒުވާނުންނަށް އެތަންތަން ބޭނުން ކުރެވޭނެ ގޮތްވުން ކަމަށެވެ.
އޭނާ ވިދާޅުވީ ރަށްރަށުގައި އަޅާ ފުޓްސަލް ދަނޑުތަކަކީ ފީފާގެ އެޕްރޫވްޑް ޓާފް ދަނޑުތަކެއް ކަމަށެވެ. އެއީ ފީފާގެ މެޗެއް އެ ދަނޑުތަކުގައި ކުޅެން ޖެހުނު ނަމަވެސް، އެ މެޗެއް އެ ދަނޑުތަކުގައި ކުޅެވޭނެ ދަނޑުތަކެއް ކަމަށް މަހްލޫފް ވިދާޅުވިއެވެ.
ފުޓުބޯޅައިގެ އިތުރުން އެހެން ކުޅިވަރުތަކަށްވެސް އިސްކަން ދެމުން ގެންދާ ކަމަށާއި އެގޮތުން ވޮލީ ކުޅުމަށްޓަކައި ވެސް އިންޑޯ ކޯޓުތަކެއް ހެދުމުގެ މަސައްކަތް ކުރަމުން އަންނަ ކަމަށް މަހްލޫފު ވިދާޅުވިއެވެ. އޭނާ ވިދާޅުވީ ބޭނުންވަނީ ވެލި ދަނޑުތަކުން ރަނގަޅު ފެންވަރުގެ ވޮލީ ކޯޓުތަކަކަށް އެތަންތަން ބަދަލު ކުރުމަށް ކަމަށެވެ. އެގޮތުން އެ ކޯޓުތައް ޑިޒައިންކޮށް އެ މަސައްކަތުގެ ބީއޯކިއުގެ މަސައްކަތް ކުރިއަށްދާ ކަމަށް އޭނާ ފާހަގަކުރެއްވިއެވެ.
އޭނާ ވިދާޅުވީ ޖަޒީރާ ޗެމްޕިއަންޝިޕް މުބާރާތް ފެށެންވާއިރަށް މިނިސްޓްރީން ރަށްރަށުގައި އަޅާ ދަނޑުތަކުގެ ބޭނުން ހިފޭވަރު ވާނެ ކަމަށެވެ.
