ބޯހިޔާވަހިކަމުގެ މައްސަލައަށް ހައްލެއް ހޯދުމުގެ ގޮތުން ކުރިއަށްގެންދާ މަޝްރޫއެއް ކަމަށްވާ ގިރާވަރު ފަޅު ހިއްކަން ފަށައިފިއެވެ.
އެ މަސައްކަތް ފަށާފައިވާކަން ހާމަކޮށްފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ. އެކްސްގައި ހިއްސާ ކުރެއްވި ފޮޓޯތަކަކާއެކު އެމަނިކުފާނު ވިދާޅުވީ، މިއަދު ހެނދުނު ގިރާވަރު ހިއްކުމުގެ މަސައްކަތް ފަށާފައިވާ ކަމަށެވެ.
ސީއެމްސީ-ބޮސްކާލިސްއާ ހަވާލުކޮށްގެން ކުރިއަށްދާ މި މަޝްރޫއުގެ ދަށުން 160 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. ގިރާވަރުފަޅު ހިއްކަން އަލުން މިއަދު ފަށާފައިވާއިރު ގިރާވަރު ފަޅުގެ އާ ލޭންޑް ޔޫސް ޕްލޭނެއް ތައްޔާރުކޮށް، އެ ޕްލޭނުގެ ދަށުން ގޯތި ލިބުނު ސަރަހައްދުތައް ބަދަލުވެފައިވާތީ މާދަމާ ވަނީ ގޯތީގެ ގުރު ނަގަން ތާވަލުކޮށްފައެވެ.
ގިރާވަރު ފަޅުން ދޫކުރަނީ 1،250 އަކަފޫޓުގެ 2،605 ޕްލޮޓާއި 1،650 އަކަފޫޓުގެ 1،213 ޕްލޮޓާއި 2050 އަކަފޫޓުގެ 253 ޕްލޮޓުގެ އިތުރުން 2،450 އަކަފޫޓުގެ އެއް ޕްލޮޓެވެ.
ކުރީ ސަރުކާރުން ފެށި ބިންވެރިޔާ ސްކީމުގެ ދަށުން ގިރާވަރުފަޅުން ފުރަތަމަ ނިންމީ 2،000 ގޯއްޗެވެ. ނަމަވެސް ގިރާވަރު ފަޅުން ބިން ދޫކޮށްފައިވާ އަދަދަށް ގޯތި ނުނެގޭތީ، ބާކީ ގޯތި ގުޅިފަޅުން ދޭން ސަރުކާރުން ނިންމައި، ގޯތި ބަދަލުކުރުމަށް އެދި ހުށަހެޅުމަށް އޭޕްރީލް ހަތެއް، 2024ގައި ހުޅުވާލިއެވެ. އެ ފުރުސަތުގައި ގުޅީފަޅަށް ގޯތި ބަދަލު ކުރުމަށް 2210 މީހުން އެދުނެވެ. އެ މީހުންގެ މެދުގައި ޖޫން މަހު ވަނީ، ގުރު ނަގާފައެވެ.
