ދިވެހިރާއްޖޭގެ ޝަރުއީ ދާއިރާގެ ކޯޓުތަކާއި އިދާރާތައް އޮޓޮމޭޓްކޮށް، ޝަރުއީ އަދި އިދާރީ ހިންގުން ހަރުދަނާ ކުރުމަށް ޓަކައި ޝަރުއީ ދާއިރާގެ ކޯޓުތަކާއި އިދާރާތައް އެއް ވިއުގައަކުން ގުޅައިލެވި، ޑޭޓާ މެނޭޖުކޮށް ރައްކާ ކުރުމަށް ބޭނުންވާ ޑޭޓާ ސެންޓަރެއް ގާއިމު ކޮށްފިއެވެ. މި ތަރައްގީ ކުރެވުނު އެޕްލިކޭޝަން ނުވަތަ ސޮފްޓުވެއާގެ ނަމަކީ މޯލްޑިވްސް އީކޯޓު މެނޭޖްމަންޓް ސިސްޓަމް (މެމްސް)އެވެ.
ޑިޕާޓުމަންޓު އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން މިއަދު ބުނީ ޝަރުއީ ދާއިރާގެ މަސައްކަތް ހަލުވިކޮށް ހަރުދަނާ ކަމާއެކު ހިންގުމަށް ޓަކައި މަރުކަޒީ ނިޒާމެއްގެ ތެރެއިން އެކަން ބެލެހެއްޓިގެން ދިއުމަކީ މުޅި ނިޒާމުގެ ރައްކާތެރިކަމަށާއި، ނިޒާމުގެ ފުރިހަމަކަމަށާއި، ޢާންމުންނަށް ދެވޭ ހިދުމަތުގެ ފެންވަރު މަތިކުރުމަށް ބޭނުންތެރި ކަމެއް ކަމަށެވެ. އެހެން ކަމުން ޝަރުއީ ދާއިރާގެ ވަކިވަކި ކޯޓުތަކާއި އިދާރާ ތަކުގައި ހޯސްޓް ކުރެވިފައި ވާ ކޭސް މެނޭޖްމަންޓް ސިސްޓަމް ތަކާއި، މެމްސްގެ އެންމެހައި އެޕްލިކޭޝަންތައް، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުގައި ގާއިމު ކޮށްފައިވާ ޝަރުއީ ދާއިރާގެ ޑޭޓާ ސެންޓަރުގެ ސާވާތަކުގައި ހޯސްޓް ކުރުމަށާއި، މެމްސްއާ ގުޅުން ހުރި އެންމެހައި ޑޭޓާ އެ ސާވާތަކުގައި ރައްކާ ކުރާގޮތަށް، ޖުޑީޝަލް ސާވިސް ކޮމިޝަނުން މިހާރު ނިންމާފައިވާ ކަމަށް ޑީޖޭއޭއިން ބުނެއެވެ.
މެމްސް ބޭނުން ކުރުމުގެ އުސޫލުގައި ބުނެފައި ވަނީ ޝަރުއީ ދާއިރާގެ އެންމެހައި ކޯޓުތަކާއި އިދާރާތަކުގެ ކޭސް މެނޭޖު ކުރުމަށާއި ކުށުގެ ރިކޯޑާއި، ވަރިކާވެނީގެ ރެކޯޑުތަކާއި ސާބިތު ހަރަދުތަކުގެ ރެކޯޑު ބެލެހެއްޓުމާއި ސާބިތު ދަރަންޏާއި ދުވަސްވީ ޝަރުއީ ލިޔުންތައް ދެމެހެއްޓުމާއި ކޯޓުން ނެރެން ޖެހޭ އެންމެހައި އަމުރަތައް ނެރުމާއި ޝަރީއަތާ ގުޅުން ހުރި އެންމެހައި މަސައްކަތްތައް އަދި ޝަރީއަތާ ސީދާ ގުޅުންނެތް އިދާރީ މަސައްކަތްތައްވެސް ކުރަން ވާނީ މެމްސްގެ ތެރެއިން ކަމަށެވެ.
އަދި ބުނެފައިވަނީ ޝަރުއީ ދާއިރާގައި ބޭނުން ކުރާ ރަސްމީ ސޮފްޓުވެއާ އަކީ މެމްސް ކަމަށެވެ. އެހެން ކަމުން ޝަރުއީ ދާއިރާގެ އެއްވެސް ކޯޓަކުން ނުވަތަ އިދާރާ އަކުން ބަޖެޓުން ހަރަދުކޮށްގެން އިތުރު ސޮފްޓުވެއާ އެއް ޑިވެލޮޕް ކޮށްގެން ނުވާނެ ކަމަށެވެ.
