ނުރަސްމީ ދަތުރުފުޅެއްގައި ރައީސްގެ ދެކަނބަލުން ސްރީލަންކާއަށް ކުރެއްވި ދަތުރުފުޅު ނިންމަވާލެއްވުމަށްފަހު މިއަދު ރާއްޖެއަށް ވަޑައިގެންފިއެވެ.
ރައީސް އިބްރާހިމް މުހައްމަދު ސޯލިހާއި، އެމަނިކުފާނުގެ އަނބިކަބަލުން ފަޒްނާ އަހުމަދު ސްރީލަންކާއަށް ކުރެއްވި ދަތުރުފުޅަކީ ޗުއްޓީ ހޭދަ ކުރެއްވުމަށް ކުރެއްވި ދަތުރު ފުޅެކެވެ. ރައީސްގެ ދެކަނބަލުން ނުރަސްމީ ދަތުރުފުޅެއްގައި ލަންކާއަށް ވަޑައިގެންނެވީ މިމަހުގެ 14 ވަނަ ދުވަހުއެވެ. ރައީސް ލަންކާއަށް ކުރެއްވި މި ދަތުރުފުޅަކީ ހަތަރު ދުވަހުގެ ދަތުރުފުޅެކެވެ. އެނގިފައިވާ ގޮތުގައި ރައީސް ލަންކާއަށް ކުރެއްވި ދަތުރުފުޅަކީ އާއިލާ ބޭފުޅެއްގެ ކައިވެނި ހަފްލާގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ. ނަމަވެސް މި ދަތުރާ ގުޅޭ އެއްވެސް އިތުރު މައުލޫމާތެއް ރައީސް އޮފީހުން ހާމަކޮށްފައެއް ނުވެއެވެ.
ރައީސް ސޯލިހު ވަނީ މިއަހަރުގެ ތެރޭގައި ލަންކާއަށް ރަސްމީ ދަތުރުފުޅެއް ކުރައްވާފައެވެ. އެއީ ސްރީލަންކާގެ ރައީސް މައިތުރިޕާލަ ސިރިސޭނަގެ ދަޢުވަތަކަށް ކުރެއްވި ފުރަމާނަ ދަތުރުފުޅެކެވެ. މިދަތުރުފުޅުގައި އެމަނިކުފާނު ވަނީ ސްރީލަންކާގެ 71 ވަނަ މިނިވަން ދުވަސް ފާހަގަކުރުމަށް ބޭއްވި ރަސްމިއްޔާތުގެ ޝަރަފުވެރި މެހެމާނެއްގެ ގޮތުގައި އެރަސްމިއްޔާތުގައި ބައިވެރިވެވަޑައިގެންފައެވެ.
