ހުޅުމާލޭ ކުޑަކުދިންގެ ހިޔާގެ ފާރު މައްޗަށް ކުދިންތަކެއް އަރާ ތިއްބާ ފުލުހުން އެކުދިން އެތަނުން ބާލުވައިފި އެވެ.
ހުޅުމާލޭގައި ހިންގަމުންދާ ފިޔަވަތީގެ ފާރު މައްޗަށް ކުޑަކުދިންތަކެއް އަރައިގެން އުޅޭ ފޮޓޯތަކެއް ސޯޝާލް މީޑިއާގައި ވަނީ އާންމުވެފަ އެވެ. އަދި އެކަން ފުލުހުންނަށް ރިޕޯޓްކޮށްފައި ވެއެވެ. މީގެ ކުރިންވެސް ކުޑަކުދިންގެ ހިޔާގައި ތިބި ކުދިންތަކެއް ފާރު މައްޗަށް އަރައިގެން އުޅޭ މަންޒަރުތައް ވަނީ އާންމުވެފަ އެވެ.
މިކަމާއި ގުޅިގެން ޖެންޑާ މިނިސްޓްރީން ބުނީ، އެއީ މިއަދުގެ ވަގުތެއްގައި ފިޔަވަތި މަރުކަޒުގައި ހިގާފައިވާ ހާދިސާއެއް ކަމަށެވެ. އަދި މިފަދަ ހާދިސާތަކަކީ މަދުން ނަމަވެސް ހިގަމުންދާ ހާދިސާތަކެއް ކަމަށާ، މިފަދަ ހާދިސާތަކެއް ހުއްޓުވުމަށް އަދި ތަކުރާރުވިޔަ ނުދިނުމަށް، މިނިސްޓްރީން ގިނަ ފިޔަވަޅުތަކެއް އަޅަމުންދާ ކަމަށެވެ. އަދި ހަމައެހެންމެ ކަމާ ގުޅުންހުރި އިތުރު މުއައްސަސާތަކާއެކު މަސައްކަތް ކުރަމުންދާ ކަމަށްވެސް ޖެންޑާ މިނިސްޓްރީން ބުނެއެވެ.
ދައުލަތުގެ ބެލުމުގެ ދަށުގައި ހިޔާގައި ތިބޭ ކުދިންތަކެއް ފާރު މައްޗަށް އަރާތިބި ފޮޓޯތައް ދައުރު ވެފައި ވާއިރު، މީގެ ކުރިންވެސް ވަނީ ޖެންޑާ މިނިސްޓްރީގެ އިހުމާލުން ކުޑަކުދިންގެ ހިޔާގައި ހުރި ކުޑަ ކުއްޖަކު ގެއްލިފަ އެވެ. އަދި މިކަމުގެ ސަބަބުން ޖެންޑާ މިނިސްޓްރީއަށް ވަރަށް ބޮޑަށް ފާޑުކިޔުންތައް އަމާޒުވި އެވެ.
މިތާ ތިބޭ ކުދިންނާ ދޭތެރޭ އެތާ ކުދިން ބަލަހައްްޓަން ތިބޭ މީހުން ކަންތައް ކުރަނީ ވަރަށް އިހާނެތި ކޮށް. ކާކު އެކަން ބަލާނީ. ކާކު ކައިރީ އެކުދިން ބުނާނީ. ވެދާނެނު އެތަނުން ސަލާމަތް ވާން އެކުދިން ބޭނުން ވަނީ ކަމަށް ވެސް. ޖެންޑަރ މިނިސްޓްރީއިންވެސް އެކުދިން އެތަނަށް ލެވުނީމަ ނިމުނީ. ކުދިންނާ ދޭތެރޭ އެތާ ތެރެއިން ކަންތައް ވާ ގޮތެއް ނުބެލޭ. ޖަލުތަކުގަ ވެސް ނުދޭ ކަހަލަ އަނިޔާ އެތަނުންވެސް ކުދިންނަށް ލިބޭ. ފާޑަކަށް ޖަލކަށް ލާފަ ތިބޭހެން އެކުދިން އެތިބެނީ. ހަމަ އެކަނި ބޭރު ފެންނަނީ ސްކޫލަށް ދާން ނެރޭ ވަގުތު. އެއީވެސް އިންސާނުން. އިހުސާސް ތަކެއްވެސް ވާނެ އެކުދިންގެ. ކުށުގެ ވެށިން ނެރެފަ ގެންގޮސް އެއްވެސް ކުށެއް ނެތް މައުސޫމް ކުދިން ތަކެއް "ޖަލަކަށް" ލާފަ. އަސްލު އެތާ މުއައްޒަފުން ވެސް އެކުދިންނަށް އެހާ އޯގާތެރި ނޫނީ އެމީހުން ހަމަ އެކަނި ބޭނުމީ މުސާރަ ކޮަޅު. ނޭނގެ މިއަދު އެތާ ފާރުމައްޗަށް އެރި ކުއްޖާ އަށް ދޭނީ ކޮން އަދަބެއް ކަމެއް އެތެރެއަށް ވައްދާފަ. އެތާ އިންނަ "ގުދަނަށް" ލާނީކީ ނޫންބާ ދެތިން ދުވަސް ވަންދެން. ﷲ މިކުދިންނަށް ހެޔޮ ގޮތެއް މިންވަރު ކުރައްވާށި.