މާލޭގެ މަގުތަކުގައި މަހަކު އެއްފަހަރު ހިނގައިފައި އުޅުމާ ގުޅޭ ގޮތުން އާންމުންގެ ހިޔާލު ހޯދުމަށް ސިޓީ ކައުންސިލުން ހުޅުވާލައިފި އެވެ.
ސިޓީ ކައުންސިލުން ބުނީ ކޮންމެ މަހަކު އެއްފަހަރު މާލޭގެ މަގުމަތީގައި އުޅަނދުފަހަރު ނުދުއްވާ ގޮތައް ކަނޑައެޅުމަށް މަޝްވަރާ ކުރަމުންދާ ކަމަށެވެ. މާލެ ސިޓީ ކައުންސިލްގެ ޑެޕިއުޓީ މޭޔާ ޝަމާއު ޝަރީފް ކުރެއްވި ޓުވީޓެއްގައި ވިދާޅުވެފައިވަނީ ދުނިޔޭގެ އެހެނިހެން ގައުމުތަކުގައި ވެސް ކޮންމެ މަހަކު އެއްފަހަރު ހިނގައިފައި އުޅޭ ވަކި ދުވަހެއް ހާއްސަކޮށްފައިވާ ކަމަށެވެ. އެހެންކަމުން މާލޭގައި ފައިމަގުގައި އުޅޭ ދުވަހެއް ކަނޑައެޅުމަށް އާއްމުންގެ ހިޔާލަށް ޝަމާއު ވަނީ އޭނާގެ ޓްވީޓާ މެދުވެރިކޮށް ހުޅުވާލައިފައެވެ. ޝަމާއު ވިދާޅުވީ މާލޭގައި ފައިމަގުގައި އުޅޭ ދުވަހެއް ކަނޑައެޅުމަކީ ރަނގަޅު ކަމެއް ކަމަށް ގަބޫލުކުރާ ރައްޔިތުން "ޔޭސް" ޖެހުމަށްފަހު އޭނާގެ ޓްވީޓަށް ރިޕްލައި ކުރުން އެދޭ ކަމަށެވެ. އަދި އެކަމާއި މެދު ހިތްހަމަ ނުޖެހޭ ރައްޔިތުން "ނޯ" ޖެހުމަށްފަހު ރިޕްލައި ކުރުން އެދޭ ކަމަށް ޝަމާއުގެ ޓްވީޓުގައިވެއެވެ.
ސިޓީ ކައުންސިލުން ބުނީ ހާއްސަ މުނާސަބަތުތަކާއި ގުޅިގެން އުޅަނދުފަހަރުތައް ނުދުއްވާ، ފައިމަގުގައި އުޅޭ ވަގުތުކޮޅެއް ކަނޑައެޅުމުން ވަރަށް ގިނަ ފަރާތްތަކުގެ ތަރުހީބު ލިބިގެންދާ ކަމަށެވެ. ހާއްސަ ދުވަސްތަކާއި ގުޅިގެން މާލޭގައި މިހާރަކަށް އައިސް ވެހިކަލް ނުދުއްވާ ދުވަސްތައް ކަނޑައަޅައެވެ. އެގޮތުން މި ފެށޭ އޯގަސްޓް މަހުގައި އަންނަ އަޟްހާ އީދާ ދިމާކޮށްވެސް ދުއްވާ އެއްޗެހި ދުއްވުން މަނާ ގަޑިއެއް ކަނޑައެޅިގެންދާނެ ކަމަށް ސިޓީ ކައުންސިލުން ބުނެއެވެ.
