މިހާރު ދަރުމަވަންތަ ހޮސްޕިޓަލުގައި ހުރި ބައެއް ބޯޑުތަކުން އެ ފެންނަ އާ ލަފުޒުތަކަކީ އައިޖީއެމްއެޗްގެ އެދުމަކަށް ބަސް ކޮމެޓީގެ ފަންނީ ކޮމެޓީން އެ ހޮސްޕިޓަލަށް ގޮސް އެތާ ތިބެ ކޮށްދިން މަސައްކަތެއް ކަމަށް ދިވެހި ބަހުގެ އެކަޑެމީން ބުނެފިއެވެ. އެކަޑެމީން ބުނީ އެތާގައި ތިބެ އެމަސައްކަތް ކުރީ ކަމާބެހޭ ފަރާތްތަކުގެ ލަފާވެސް ހޯދަމުން ކަމަށެވެ.
އެކަޑެމީއަށް ފާޑުކިޔުންތައް ބޮޑުވީ އައިޖީއެމްއެޗްގައި ހަރުކޮށްފައި ހުރި ބޯޑުތަކެއްގައި ދިވެހިންގެ ތެރޭގައި ވަރަށް އައިބު ބަސްތަކެއް ބޭނުންކޮށް އިނގިރޭސި ނަންތަކެއްގެ ބަދަލުގައި އެ ނަންތައް ބޭނުންކުރުމާ ގުޅިގެންނެވެ.
ސޯޝަލްމީޑިއާގައިވެސް ވައިރަލްވެފައިވާ މި ނަންތަކާ ގުޅިގެން އެކަޑެމީން ބުނީ، ސްޓެރައިލް ކޮރިޑޯއަށް ދިވެހި ލަފުޒެއް ހަދަން ބެލި އިރު އެ ލަފުޒަކީ އިނގިރޭސި ބަހުގެ ވެސް މުރައްކަބު ނަމެއް ކަމަށާ ސްޓެރައިލްއާއި ކޮރިޑޯއާ އެކުވެގެން ހެދިފައި އޮތް ލަފުޒެއް ކަމަށެވެ. އޭގެތެރެއިން ކޮރިޑޯގެ މަފުހޫމު އަދާކުރާ ލަފުޒެއް މުނިކާފަ ޒަމާނުއްސުރެ ދިވެހި ބަހުގައި އޮންނަ ކަމަށާ، އެއީ "ސަރައްކާލި"އެވެ.
ސަންސުކްރިތު ޕާލީ ސިންގަޅަ ތަމަޅަ ބަސް ބެލުމަށް ފަހު އަރަބި ބަސް ބެލުމުން ސްޓެރައިލްގެ ބަދަދަލުގައި ޢަޤީމު ބޭނުން ކޮށްފައި ވާތީ ފެނުމުން އެ ލަފުޒު ދިވެހި އަޑުތަކަށާއި ފޮރޮޅުންތަކަށް ފައްތައިގެން އަގީމު ސަރައްކާލި ހެދީި ކަމަށެވެ.
މި ލަފުޒު ހެދީ ދުނިޔޭގެ ކުރި އަރައިފައިވާ ބަސްބަހުގެ ބަސްވާރުން ވެސް ކަންކުރާހަމައިން ކަމަށްވެސް އެކަޑެމީން ބުނެއެވެ.
އައިޖީއެމްއެޗްގައި ފެންނަން ހުރި ބައެއް ބޯޑުތަކަށް ބަލާއިރު 'އަގީމު ސަރައްކާލި' އާއި 'އަރެސް ދޮވެބަހައްޓާ ކޮޓާރު' ފަދަ ނަންނަން ފެންނަން ހުއްޓެވެ.
