9 އަހަަރުގެ ކުއްޖާއަށް ޖިންސީ އަނިޔާ ކުރި މައްސަލައިގައި 71 އަހަރުގެ ފިރިހެނަކު ހައްޔަރުކޮށްފިއެވެ.
ފުލުހުން ބުނީ 9 އަހަަރުގެ ކުޑަ އަންހެން ކުއްޖަކަށް ޖިންސީ އަނިޔާ ކުރި މައްސަލައިގައި 71 އަހަރުގެ ފިރިހެނެއް މިއަދު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. ނަމަވެސް މިކަމުގެ ތަފްސީލެއް ފުލުހުން ހާމައެއް ނުކުރެއެވެ.
މިމީހާގެ އިތުރުން 9 އަހަރުގެ ކުޑަ އަންހެން ކުއްޖާގެ ދެ ބޭބެއިން އޭނާއަށް ޖިންސީ އަނިޔާ ކުރިކަމަށް ފުލުހުން ތުހުމަތުކުރެއެވެ. މި ދެކުދިންނަކީ އުމުރުން 13 އަހަރާއި 16 އަހަރުގެ ދެ ކުދިންނެވެ.
ފުލުހުން ދަނީ މި މައްސަލަ ފެމިލީ، ޗައިލްޑް، އެންޑް ސޯޝަލް ސާވިސަސް ސެންޓަރާއި ގުޅިގެން އިތުރަށް ތަހުގީގު ކުރަމުންނެވެ.
ބައެއް މީޑިއާތަކުން، 9 އަހަރުގެ ކުޑަކުއްޖަކު ރޭޕް ކުރި ކަމަށް ބުނެ ރިޕޯޓްކޮށްފައި ވާއިރު އެ މީޑިއާތަކުން ބުނީ، 9 އަހަރުގެ ކުޑަ ކުއްޖަކު ރޭޕް ކުރީ އެކުއްޖާގެ މަންމަގެ ލޯބިވެރިޔާ ކަމަށާއި އަދި އެ މައްސަލައާއި ގުޅިގެން ޖެންޑާ މިނިސްޓްރީން އެ ކުއްޖާ، މަންމަގެ އަތުން އަތުލާފައިވާ ކަމަށެވެ.
މިކަމާ ގުޅިގެން ޖެންޑާ މިނިސްޓްރީން ބުނީ، 9 އަހަރުގެ ކުއްޖަކަށް މަންމަގެ ލޯބިވެރިޔާ ރޭޕްކުރި މައްސަލައާއި 9 އަަހަރުގެ ކުއްޖަަކަށް އޭނާގެ ދެބޭބެ ޖިންސީ ގޯނާކުރި މައްސަލައަކީ ދެ މައްސަލައެއް ކަަމަށެވެ. އެގޮތުން 9 އަހަރުގެ ކުޑަ ކުއްޖަކު ރޭޕް ކުރި މައްސަލައެއް އެ މިނިސްޓްރީއަށް ރިޕޯޓް ކޮށްފައި ނުވާ ކަމަށް ޖެންޑާ މިނިސްޓްރީއިން ބުނެއެވެ. ނަމަވެސް މި މަހުގެ 10 ވަނަ ދުވަހު ކުޑަކުއްޖަކަށް އޭނާގެ ދެބޭބެ ޖިންސީ ގޯނާކުރި މައްސަލަވަނީ އެ މިނިސްޓްރީއަށް ރިޕޯޓްކޮށްފައި ކަމަށާއި މިހާރު އެކުއްޖާ ވަނީ ރައްކާތެރި މާހައުލަކަށް ގެންދެވިފައި ކަމަށް ޖެންޑާ މިނިސްޓްރީން ބުނެއެވެ.
ފުލުހުން ބުނީ، ކުޑަކުދިންނަށް ކުރާ އަނިޔާ އަކީ ފުލުހުން ސީރިއަސް މައްސަލައެއްގެ ގޮތުގައި ބަލާ މައްސަލައެއް ކަމަށެވެ.
