މި އަހަރުގެ މަޖިލިސް އިންތިހާބުގައި އޮފިޝަލުންގެ ގޮތުގައި ސިޔާސީ ޕާޓީ ތަކުގެ މެންބަރުން ހަރަކާތްތެރިވި ކަމަށާއި، އެ މީހުންނާ ގުޅޭ ގޮތުން ނަތީޖާ އަށް ބަދަލު އަންނަ ވަރުގެ އެއްވެސް ޝަކުވާއެއް ލިބިފައި ނުވާ ކަމަށް އިލެކްޝަންސް ކަމިޝަން (އީސީ) އިން ބުނެފިއެވެ.
އީސީން މިއަދު ބޭއްވި ނޫސްވެރިންގެ ބައްދަލު ވުމެއްގައި އެ ކަމިޝަންގެ ރައީސް އަހްމަދު ޝަރީފް ވިދާޅުވީ، އިސް މަގާމެއް ނުވަތަ އެކްޓިވިސްޓެއްގެ ގޮތުގައި ހަރަކާތްތެރި ނުވާ ސިޔާސީ ޕާޓީގެ މެންބަރުން އޮފިޝަލުންނަށް ނަގަން ޖެހުނީ، އޮފިޝަލުން ހޯދުމަށް ދިމާވި ދަތި ތަކާ ގުޅިގެން ކަމަށެވެ.
މި ފަހަރުގެ އިންތިހާބުގައި އޮފިޝަލުން ހަމަ ނުވެގެން 3 ފަހަރެއްގެ މަތިން އިލެކްޝަންސް އިން އިއުލާނު ކޮށްފައި ވެއެވެ.
އޮފިޝަލުން ހޯދުމަށް ފުރަތަމަ އީސީން ކުރި އިއުލާނުގައި ސިޔާސީ ޕާޓީއެއްގެ މެންބަރަކަށް ނުވުން ޝަރުތު ކޮށްފައިވާ ކަމަށް ޝަރީފް ވިދާޅުވިއެވެ. އެ އިއުލާނާ ގުޅިގެން އެ ކަމަށް ކުރިމަތިލީ އެންމެ 400 މީހުން ކަމަށާއި އިންތިހާބަށް 4000 އަށް ވުރެ ގިނަ މީހުން ބޭނުންވި ކަމަށް ޝަރީފް ވިދާޅުވިއެވެ.
"ދެ ވަނަ ފަހަރަށް އިއުލާން ކުރުމުން ވެސް އޮފިޝަލުން އިތުރުނުވުމުން އަޅުގަނޑުމެން ނިންމީ، ސިޔާސީ ޕާޓީއެއްގައި އުޅުނުކަމުގައި ވިޔަސް ސިޔަސީ އިސް ހަރަކާތްތެރިއެއްގެ ގޮތުގައި ނުވަތަ ސިޔާސީ ޕާޓިއެއްގެ އިސް މަގާމެއްގައި ހަރަކާތްތެރި ނުވާ ކޮންމެ ފަރާތަކީ، ވޯޓު އޮފިޝަލެއްގެ ގޮތުގައި ބެހެއްޓި ދާނެ ކަމަށް،" ޝަރީފް ވިދާޅުވިއެވެ.
ހޮނިހިރު ދުވަހު ބޭއްވި މަޖިލިސް އިންތިހާބުގައި އޮފިޝަލުންގެ ގޮތުގައި ޖުމްލަ 4636 މީހުން ހަރަކާތްތެރި ވެފައި ވެއެވެ. މި އިންތިހާބުގައި ވޯޓުލީ މީހުންގެ އަދަދަކީ، 215،053 މީހުންނެވެ. މިއީ ރާއްޖޭގައި މިހާތަނަށް އެންމެ ގިނަބަޔަކު ވޯޓުލީ މަޖިލިސް އިންތިހާބެވެ.
