މިފަހަރުގެ މަޖިލިސް އިންތިހާބުގައި މާމިގިލީ ދައިރާގެ ސައްހަ ވޯޓު ބާތިލު ވޯޓު ކަމަށް ކަނޑައަޅާ، ނަތީޖާ ޝީޓުގައި ސޮއެ ކުރި ފަރާތްތަކާ މެދު އިލެކްޝަންސް ކަމިޝަނު(އީސީ)ން ފިޔަވަޅު އަޅާނެ ކަމަށް އެ ކަމިޝަނުގެ ރައީސް އަހްމަދު ޝަރީފް ވިދާޅުވެއްޖެއެވެ.
މާމިގިލީ ދާއިރާގެ 3 ވޯޓު ފޮށްޓެއްގައި އާދަޔާ ހިލާފަށް ބާތިލު ވޯޓު އިތުރުކަމަށް ވަގުތީ ނަތީޖާއިން ދައްކާތީ، އެ ފޮށީގައި ހުރި ބާތިލު ވޯޓުތައް އީސީން މިރޭ ވަނީ އަލުން ގުނާފައެވެ.
އެ ވޯޓުފޮށިތައް މާމިގިލީގައި ގުނި އިރު ބާތިލު ވޯޓުގެ ގޮތުގައި 143 ވޯޓު ގުނާފައި ވެއެވެ. އެކަމަކު އެ ވޯޓުތައް އަލުން ގުނުމުން، އެ ތިން ފޮށިން ބާތިލުވެފައި ވަނީ 36 ވޯޓު ކަމަށް ޝަރީފް ވިދާޅުވިއެވެ. އަދި އޭގެ ސަބަބުން 100 އެތައް ވޯޓެއްގެ ސައްހަ ކަން މިހާރު ކަށަވަރު ވަފައި ވާކަމަށް ވެސް އޭނާ މިރޭ ވިދާޅުވިއެވެ.
ޝަރީފް ވިދާޅުވީ، ސައްހަ ވޯޓެއް ބާތިލު ވޯޓެއްގެ ގޮތުގައި ގުނުމަކީ ގާނޫނީ ބޮޑު ކުށެއް ކަމަށެވެ. އަދި އެ ވޯޓު ފޮށީގެ ނަތީޖާ މާދަމާ އީސީއަށް ހުށައެޅުމުން މި ކަމުގައި ޒިންމާ ވާންޖެހޭ ފަރާތް ތަކާ މެދު ފިޔަވަޅު އަޅާނެ ކަމަށް އޭނާ ވިދާޅުވިއެވެ.
އެ ވޯޓު ފޮށި ތަކުގައި ހިމެނޭ ބާތިލު ވޯޓުގެ އަދަދަށް މިއައި ބަދަލާ އެކު، އެ ދާއިރާއަށް ވާދަ ކުރައްވާ އިންތިހާބު ކާމިޔާބު ކުރެއްވި ޖުމްހޫރީ ޕާޓީގެ ލީޑަރު ގާސިމް އިބްހީމާއި، އަދި އެމްޑީޕީގެ ކެންޑިޑޭޓް އަލީ އަމީޒަށް ލިބިވަޑައިގެން ފައިވާ ވޯޓު ވަނީ އިތުރު ވެފައެވެ. އެހެން ނަމަވެސް ވޯޓުގެ އަދަދަށް އައި ބަދަލު ފިޔަވާ ނަތީޖާއަށް އިތުރު ބަދަލެއް އައިސްފައެއް ނުވެއެވެ.
