ބަރާބަރު 8 މަސް ދުވަސްތެރޭ އެމްޑީޕީ ދެފަޅި ވާނެ ކަމަށް ކުރީގެ އިކޮނަމިކް މިނިސްޓަރު އަދި ޕީޕަލްސް ނެޝަނަލް ކޮންގްރެސް (ޕީއެންސީ)ގެ ނައިބު ރައީސް އަދި ލ. މާވަށު ދާއިރާގެ މަޖިލީސް ގޮނޑި ކާމިޔާބު ކުރެއްވި މުހައްމަދު ސައީދު ވިދާޅުވެއްޖެއެވެ.
މަޖިލީހުގައި އެމްޑީޕީއަށް ލިބިފައިވާ ބޮޑު މެޖޯރިޓީ އާ ގުޅޭ ގޮތުން، 'ދަ ޕްރެސް' އާ ވާހަކަ ދައްކަވަމުން ސައީދު ވިދާޅުވީ، އެމްޑީޕީ ދެފަޅި ވުމުން މަޖިލީހުގެ މެޖޯރިޓީ އެއްވެސް ބަޔަކަށް ނޯންނާނެ ކަމަށެވެ. އަދި އޭރުން އޮންނާނީ ކުރީގެ ރައީސް މުހައްމަދު ނަޝީދުގެ ޕާޓީ އަކާއި، ރައީސް އިބްރާހިމް މުހައްމަދު ސޯލިހުގެ ޕާޓީ އެއް ކަމަށެވެ.
"އޭރުން އޮންނާނީ އިބްރާހިމް މުހައްމަދު ސޯލިހު ގެ ޕާޓީ އަކާ ރައީސް ނަޝީދު ގެ ޕާޓީ އެއް. ދެން ރައީސް ނަޝީދު ގެ ޕާޓީން ލާދީނީ ފިކުރު ޕްރޮމޯޓު ކުރާނީ، އިބްރާހިމް މުހައްމަދު ސޯލިހަށް ނުކެރޭނެ އެއާ މާބޮޑަކަށް ބައިއަތު ހިފާކަށް އިމްރާނާ އަދާލަތު ޕާޓީ މީހުން ކައިރީ ބައިތިއްބައިގެނެއް، ދެން އަދާލަތު ޕާޓީ ވެސް ޖެހޭނީ ކަނުބަނދެވިގެން ތިބެން" ސައީދު ވިދާޅުވިއެވެ.
ސައީދު ވިދާޅުވީ ރައީސް ނަޝީދު ގެންގުޅުއްވާނެ ވިސްނުންފުޅަކީ ލާދިނީ ފިކުރު ޕްރޮމޯޓު ކުރުން ކަމަށް ވިޔަސް އަދާލަތާ އަދި ރައީސް އިބްރާހިމް މުހައްމަދު ސޯލިހަށް އެކަމުގައި މާބޮޑު ދެކޮޅު ހެއްދެވުމެއް ނުގެންގުޅުއްވޭނެ ކަމަށެވެ. ސައީދު އިޝާރާތް ކުރައްވަނީ ރައީސް ނަޝީދުގެ ނުފޫޒާ ބާރު ސަރުކާރުގެ ތެރޭގައާއި ޕާޓީގެ ތެރޭގައި އޮންނަ މިންވަރަށަށެވެ.
ސައީދު އިތުރަށް ވިދާޅުވީ ނިމިދިޔަ އިންތިހާބުގައި އިދިކޮޅަށް ކެމްޕޭނު ކުރުމުގެ ފުރުސަތު ހެޔޮ ގޮތުގައި ނުލިބުމާ އެއް ދާއިރާއަކަށް ގިނަ ބަޔަކު ނުކުތުމާއެކު ގިނަ ގޮނޑިތަކެއް ގެއްލިގެން ދިޔަ ނަމަވެސް ވޯޓުލީ އަދަދަށް ބަލާއިރު ގިނައީ އެމްޑީޕީއާ ދެކޮޅަށް ދިން ވޯޓު ކަމަށެވެ. އަދި އެކަމުގެ [މަޖިލީހުގެ ގިނަ ގޮނޑި ލިބުމުގެ ސަބަބުން] ރައީސް ނަޝީދު ބޭނުންފުޅު ވިއަސް ވެރިކަން ކުރާ ނިޒާމު ބަދަލު ނުކުރެވޭނެ ކަމަށެވެ. އެ ޖާގަ ރައްޔިތުންވެސް ނުދޭނެ ކަމަށް ސައީދު ވިދާޅުވިއެވެ.
ނިމިދިޔަ މަޖިލީސް އިންތިހާބުގައި ސައީދު ނިސްބަތްވެ ވަޑައިގަންނަވާ ޕާޓީ، ޕީއެންސީއަށާއި ޕީޕީއެމް އަށް ލިބިފައިވަނީ އެންމެ 7 ގޮނޑިއެވެ. ވެރިކަން ކުރާ އެމްޑީޕީން ވަނީ 65 ގޮނޑި ކަށަވަރު ކޮށްފައެެވެ. މިއީ މިހާތަނަށް ރާއްޖޭގެ ތާރީހުގައިވެސް އިދިކޮޅު މައި ޕާޓީއަށް އިންތިހާބަކުން ކުރިމަތިވި އެންމެ ބޮޑު ނާކާމިޔާބީއެެވެ. އަދި މިއީ އެއްޕާޓީއަކުން އެންމެ ގިނަ ގޮނޑި ހޯދި އިންތިހާބުވެސް މެއެވެ.
