ޕްރައިމަރީން ބަލިވުމުން ކޯޓަށް ގޮސް، މަޖިލިސް އިންތިހާބުގައި ވާދަކޮށް އިންތިހާބު ކާމިޔާބު ކުރި ކާށިދޫ ދާއިރާގެ ކެންޑިޑޭޓް އަބްދުﷲ ޖާބިރު އެޖެންޑާ19 އަށް ތާއިދުކޮށް މިނިވަންކަމާއެކު މަސައްކަތް ކުރުމުގައި ދެމިހުންނާނެ ކަމަށް އުއްމީދުކުރައްވާ ކަމަށް ޖާބިރުގެ އަނބިކަނބަލުން ދިޔާނާ ސައީދު ވިދާޅުވެއްޖެއެވެ.
އެމްޑީޕީގެ ޕްރައިމަރީގައި ވިލިނިގލި ދާއިރާއަށް ވާދަކޮށް ނާކާމިޔާބުވެވަޑައިގެންނެވި ދިޔާނާ ވަނީ ޖާބިރުގެ ކާމިޔާބީއަށް މަރުހަބާ ވިދާޅުވެފައެވެ. ދިޔާނާ ކުރެއްވި ޓްވީޓެއްގައި ވިދާޅުވީ ކޯޓަށް ވަޑައިގެން އިންތިހާބުގައި ވާދަކުރުމުގެ ހައްގު ހޯއްދަވާ، ކެންޑިޑެންސީ ކަށަވަރުކޮށް ހުރިހާ ދަތިތަކުން ކުރި ހޯއްދެވީތީ މަރުހަބާ ދަންނަވާ ކަމަށެވެ.
"އަޅުގަނޑުގެ އުއްމީދަކީ އެޖެންޑާ19 އަށް ޖާބިރު ސަޕޯޓްކޮށް، އިންތިހާބުވެވަޑައިގެންނެވި ގޮތަށް މިނިވަން ކެންޑިޑޭޓެއްގެ ގޮތުގައި ހުންނަވާނެ ކަމަށް" ދިޔާނާ ވިދާޅުވިއެވެ.
އެމްޑީޕީގެ ޕްރައިމަރީން ނާކާމިޔާބުވުމުން ޖާބިރު ވަނީ ޕްރައިމަރީން ބަލިވިޔަސް އިންތިހާބުގައި ވާދަކުރެވޭނެކަމަށް ކަނޑައަޅައި ދިނުމަށް އެދި މައްސަލައެއް ސުޕްރީމް ކޯޓަށް ވައްދާ އެ މައްސަލަ ކާމިޔާބުކޮށްފައެވެ. ނަމަވެސް މިކަމާއި ދިޔާނާ ދެކޮޅު ހެދިއެވެ. އަދި ޖާބިރަށް ދިޔާނާ ފާޑުވިދާޅުވެފައިވެސް ވެއެެ.
ޖާބިރު ވެގެން ދިޔައީ ނިމިގެން ދިޔަ މަޖިލިސް އިންތިހާބުގައި އެންމެ ތަފާތު ބަހުސެއް ކުރެއްވި އަދި ދާއިރައާއި މެދު ތަފާތު ތަސައްވުރެއް ގެންގުޅުއްވި ކެންޑިޑޭޓަކީ ޖާބިރެވެ. ކުރީގައި ވެސް ކާށިދޫ ދާއިރާގެ މެންބަރުންކަން ކުރެއްވި ޖާބިރު މި ފަހަރު އެ ދާއިރާގެ ގޮނޑި ކާމިޔާބު ކުރެއްވީ 843 ވޯޓާއެކު، އެމްޑީޕީގެ ކެންޑިޑޭޓް ބަލިކުރައްވާއެވެ. އެމްޑީޕީގެ ކެންޑިޑޭޓްގެ އިތުރުން، އިތުރު ހަތަރު ކެންޑިޑޭޓުން މަޖިލިސް އިންތިހާބުގައި މި ދާއިރާއަށް ވާދަކުރިއެވެ.
