އިއްޔެ ކުރިއަށް ދިޔަ 19 ވަނަ މަޖިލިސް އިންތިހާބުގައި ދިވެހިން ދިން މެސެޖު ވަރަަށް ސާފުކަމަށާއި ދިވެހިން ބޭނުމީ އިންސާފާއި ބަދަލެއް ކަމަށް ކުރީގެ ފޮރިން މިނިސްޓާ ދުންޔާ މައުމޫން ވިދާޅުވެއްޖެއެވެ.
ކުރީގެ ރައީސް މައުމޫން އަބްދުލްގައްޔޫމްގެ ދަރިކަނބަލުން ދުންޔާ ކުރެއްވި ޓްވީޓްގައި ވަނީ، 19 ވަނަ ރައްޔިތުންގެ މަޖިލީހަށް ހޮވިވަޑައިގެންނެވި މެންބަރުންނަށް ހަވާލުވެ ވަޑައިގެންފައިވާ ޒިންމާ އެ ބޭފުޅުން ހަނދުމަފުޅު ބަހައްޓަވާނެކަމަށް އުންމީދު ކުރައްވާ ކަމަށެވެ. އަދި މަޖިލީހުގެ ގޮނޑި ކާމިޔާބު ކުރެއްވި މެންބަރުން މި ގައުމުގެ ރައްޔިތުންނަށް އިހްލާސްތެރި ކަމާއި، ނަޒާހަތްތެރި ކަމާއެކު ހިދުމަތް ކޮށްދެއްވާނެ ކަމަށް ގަބޫލުކުރައްވާ ކަމަށްވެސް ދުންޔާ ވިދާޅުވިއެވެ.
މަޖިލިސް އިންތިހާބުގެ ވޯޓު ފޮށިތައް ގުނައި ނަތީޖާ ލިބުނުއިރު މަޖިލީހުގެ މެޖޯރިޓީ އެމްޑީޕީން ވަނީ ކާމިޔާބު ކޮށްފައެވެ. މިއީ މިހާތަނަށް އެމްޑީޕީއިން މަޖިލީހުގެ އަޣުލަބިއްޔަތު ކާމިޔާބު ކުރި ފުރަތަމަ ފަހަރުވެސް މެއެވެ. ކުރީގެ ރައީސް މައުމޫނުގެ ތާއީދާއެކު މަޖިލިސް އިންތިހާބަށް ކުރިމަތިލި އެއްވެސް ކެންޑިޑޭޓަކު ނުހޮވެއެވެ. ހަމައެއާއެކު އަދާލަތު ޕާޓީއާއި، އެމްޓީޑީއާއި، ޑީއާރްޕީގެ އިތުރުން ލޭބާ ޕާޓީއަށް ވެސް މިފަހަރު މިވަނީ ނާކާމިޔާބީއާ ކުރިމަތިލާން ޖެހިފައެވެ.
އެމްޑީޕީއަށް ލިބުނު ކާމީޔާބީ ފާހަގަކޮށް ރައީސް އިބްރާހިމް މުހައްމަދު ސޯލިހާއި ކުރީގެ ރައީސް ނަޝީދަށް ދުންޔާ ވަނީ މަރުހަބާ ދަންނަވާ ޓްވީޓެއްވެސް ކުރައްވާފައެވެ. މަޖިލިސް އިންތިހާބުގައި 85 ދާއިރާއަށް އެމްޑީޕީއިން ވާދަކޮށް ޖުމްލަ 66 ގޮނޑި ވަނީ ކާމިޔާބު ކޮށްފައެވެ. އެގޮތުން މައްޗަންގޯޅި މެދު ދާއިރާއިން ރައީސް ނަޝީދު ކުރި ހޯއްދަވާފައި ވަނީ އަމިއްލަ ގޮތުން ބައިވެރިވި ކެންޑިޑޭޓް އިބްރާހިމް މުހައްމަދާ ވާދަކޮށް 152 ވޯޓުގެ ތަފާތަކުންނެވެ.
